Kontent qismiga oʻtish

Bader Al-Mutawa

ZiyoSfera, erkin ensiklopediya
2026-yil 17-noyabr, 15:49 dagi Programmer (munozara | hissa) versiyasi
(farq) ←Avvalgi koʻrinishi | Hozirgi koʻrinishi (farq) | Yangiroq koʻrinishi→ (farq)
Bader al-Mutawa
Al-Mutawa Qadsia tarkibida (2007-yil)
Shaxsiy maʼlumot
Toʻliq ismi Bader Ahmed al-Mutawa
Tavallud sanasi 1985-yil 10-yanvar (1985-01-10) (41 yosh)
Tavallud joyi Al-Quvayt, Kuvayt
Boʻyi 1.75 m
Ampluasi Hujumchi
Professional faoliyati*
Yillar Jamoa Isht. (Gol.)
2002— Qadsia 300 (175)
2007 →  Qatar SC 0 (0)
2011 →  Al Nassr 9 (3)
Milliy terma jamoa
2003–2022 Kuvayt 202 (55)
*Professional klublardagi gollari (ichki chempionat)

Bader Ahmed al-Mutawa (arabcha: بدر أحمد المطوع‎‎; 1985-yil 10-yanvarda tugʻilgan) — quvaytlik professional futbolchi, „Qadsia“ klubi hujumchisi. Bader odatda ikkinchi hujumchi ampluasida harakat qiladi va jamoada 17-raqam ostida toʻp suradi. Al-Mutawa terma jamoalar safida eng koʻp oʻyin oʻtkazgan futbolchilar roʻyxatida 202 ta uchrashuv bilan toʻrtinchi oʻrinni egallab turibdi (undan oldinda faqat Luka Modrić, Lionel Messi va Cristiano Ronaldo bor).

Klubdagi faoliyati

Al-Mutawa Al-Quvayt shahrida tugʻilgan. Klub va terma jamoa safidagi yorqin oʻyinlari sababli u 2006 va 2010-yillarda „Osiyoning eng yaxshi futbolchisi“ mukofotiga nomzod sifatida koʻrsatilgan, biroq sovrinni qoʻlga kirita olmagan[1].

2008–09-yilgi mavsumda 10 ta gol urib, Quvayt chempionatida mahalliy futbolchilar oʻrtasida eng yaxshi toʻpurar boʻlgan.

2012-yil 23-iyulda klubning yangi xoʻjayinlari — Al-Hasaviy oilasi hujumchi uchun bir oylik sinov muddatini tashkil etganidan soʻng, u Angliyaning „Nottingham Forest“ jamoasi bilan mashgʻulotlarida ishtirok etgan[2]. U bosh murabbiy Sean O'Driscollda yaxshi taassurot qoldirgan va klub uni doimiy asosda sotib olishni rejalashtirgan, ammo futbolchiga Buyuk Britaniyada ishlash ruxsatnomasi berilmagani sababli shartnoma amalga oshmagan[3].

2021-yil 11-may kuni „Al-Quvayt“ klubiga qarshi 3–1 hisobida gʻalaba qozonilgan uchrashuvda u „Qadsia“ safidagi barcha musobaqalar (oʻrtoqlik oʻyinlarini ham qoʻshgan holda) doirasida oʻzining 300-golini kiritgan[4][5].

2024-yil 2-mart kuni „Al-Salmiya“ga qarshi kechgan va 1–0 hisobida yakunlangan oʻyinning soʻnggi daqiqalarida penaltidan gol urib, Quvayt Premyer-ligasi tarixidagi eng yaxshi toʻpurar Firas Al-Khatibning rekordini (162 ta gol) takrorlagan[6]. Oradan besh kun oʻtib, „Qadsia“ning „Al-Shabab“ ustidan 7–0 hisobida qozongan yirik gʻalabasida gol urishga muvaffaq boʻlgan va Quvayt Premyer-ligasi tarixidagi mutlaq eng yaxshi toʻpurarga aylangan.

Terma jamoadagi faoliyati

Al-Mutawaning xalqaro miqyosdagi ilk yirik musobaqasi 2003-yilda Quvayt mezbonlik qilgan Arab koʻrfazi kubogi boʻldi. Mezbonlar olti uchrashuvda bor-yoʻgʻi besh ochko jamgʻarib, oltinchi oʻrinni egallashgan (turnir debyutanti Yaman undan kamroq ochko toʻplagani sababli Quvayt oʻz tarixida ilk bor musobaqani jadvalning eng quyi pogʻonasida yakunlashdek noqulay vaziyatdan qutulib qolgan). Al-Mutawa turnirdagi Quvaytning yagona gʻalabasi — Yaman ustidan 4:0 hisobida qozonilgan oʻyinda bitta gol muallifi boʻlgan.

2004-yilda 17-Arab koʻrfazi kubogida ishtirok etgan al-Mutava musobaqaning ochilish uchrashuvida Saudiya Arabistoni darvozasiga 87-daqiqada gol urgan. U ushbu turnirda terma jamoa sardori va yulduz hujumchisi Bashar Abdullah bilan samarali hujum tandemini hosil qilib, oʻzini yorqin namoyon etgan; ikki futbolchi birgalikda beshta gol kiritishga muvaffaq boʻlgan. Biroq turnir yakunlanganidan koʻp oʻtmay Bashar terma jamoadagi faoliyatini yakunlagani bois ushbu tandem uzoqqa choʻzilmagan. Quvayt esa B guruhida ikki gʻalaba va Bahrayn bilan durang qayd etib peshqadam boʻlganiga qaramay, yarim finalda Qatarga imkoniyatni boy berib, musobaqani tark etgan.

2007-yilgi 18-Arab koʻrfazi kubogida al-Mutava Yaman hamda guruh bosqichining soʻnggi turida Birlashgan Arab Amirliklari darvozalarini ishgʻol qilgan, ammo Quvayt oʻz tarixida ilk bor turnirda birorta ham gʻalaba qozona olmay, musobaqa bilan xayrlashgan.

2015-yil 3-sentyabr kuni 2018-yilgi FIFA Jahon chempionati saralashi doirasida Myanma ustidan 9–0 hisobida qozonilgan yirik gʻalabada al-Mutava terma jamoadagi ikkinchi xet-trigini rasmiylashtirgan[7].

2022-yil 14-iyun kuni al-Mutava Soh Chin Annning FIFA tomonidan tan olingan 195 ta oʻyindan iborat rekordini ortda qoldirib, 196 ta oʻyin bilan erkaklar oʻrtasida terma jamoa safida eng koʻp uchrashuv oʻtkazgan mutlaq rekordchiga aylangan[8][9][10]. Keyinchalik 2022-yilgi FIFA Jahon chempionati davomida portugaliyalik Cristiano Ronaldo uning rekordini takrorlagan va UEFA Yevro-2024 saralashi bahslarida bu koʻrsatkichni yangilagan[11][12]. Keyinchalik statistik maʼlumotlar qayta koʻrib chiqilishi natijasida al-Mutavaning xalqaro oʻyinlari soni 202 taga yetkazilgan va u 200 ta oʻyinlik dovonni zabt etgan tarixdagi ilk futbolchi sifatida eʼtirof etilgan[13].

Shaxsiy hayoti

Quvaytda sportning professionallik tizimi toʻliq joriy etilmaganligi sababli, Al-Mutava futbolchilik faoliyati bilan bir qatorda harbiy xizmatni ham oʻtaydi. U polkovnik harbiy unvoniga ega boʻlib, Quvayt Milliy assambleyasi gvardiyasining Xavfsizlik masalalari departamenti direktori lavozimida faoliyat yuritadi[14].

Manbalar

  1. ↑ Asian Cup 2011: Asian Cup Ten Players To Watch: Bader Al Mutwa (Wayback Machine saytida 11 January 2011 sanasida arxivlangan) — Goal.com
  2. ↑ Chong, Edwin. „Al-Mutawa lands Forest chance“. Sky Sports (2012-yil 21-iyul). 2012-yil 24-avgustda asl nusxadan arxivlangan. Qaraldi: 2013-yil 12-yanvar.
  3. ↑ McDaid, Paul. „Nottingham Forest fail to land work permits for Kuwaiti trio“. Sport360.com (2012-yil 22-avgust). 2012-yil 27-avgustda asl nusxadan arxivlangan. Qaraldi: 2013-yil 12-yanvar.
  4. ↑ „القادسية يحتفي بتسجيل بدر المطوع 300 هدف“ (ar). kooora.com (2021-yil 11-may). 2021-yil 12-iyunda asl nusxadan arxivlangan. Qaraldi: 2021-yil 12-iyun.
  5. ↑ „المطوع... 300 هدف مع القادسية“ (ar). alraimedia.com (2021-yil 12-may). 2021-yil 12-iyunda asl nusxadan arxivlangan. Qaraldi: 2021-yil 12-iyun.
  6. ↑ „Badr Al-Mutawa equals a goal-scoring record in the Kuwait League“ (en). Arab Times (2024-yil 3-mart).
  7. ↑ „WORLD CUP QUALIFYING – AFC 3/9/2015 12:00*“. ESPN FC (2015-yil 3-sentyabr). 2015-yil 2-sentyabrda asl nusxadan arxivlangan. Qaraldi: 2015-yil 3-sentyabr.
  8. ↑ „Al-Mutawa reclaims title of most-capped men's player“ (en). FIFA.com. FIFA (2022-yil 16-iyun). 2022-yil 16-iyunda asl nusxadan arxivlangan. Qaraldi: 2022-yil 16-iyun.
  9. ↑ „Bader Al-Mutawa, the star of the Kuwaiti national team, is the only dean of world players“ (en). News.MiddleEast-24.com (2022-yil 15-iyun). 2022-yil 15-iyunda asl nusxadan arxivlangan. Qaraldi: 2022-yil 15-iyun.
  10. ↑ „Pelatih Tinggalkan Kuwait, Bader Al Mutawa Pecahkan Rekor“ [Coach leaves Kuwait, Bader Al Mutawa breaks record] (ms). Goal.com. Goal (2022-yil 15-iyun). 2022-yil 15-iyunda asl nusxadan arxivlangan. Qaraldi: 2022-yil 15-iyun.
  11. ↑ „World Cup 2022: Is Portugal's exit the end of the road for Cristiano Ronaldo?“. BBC Sport. 2022-yil 30-dekabrda asl nusxadan arxivlangan. Qaraldi: 2022-yil 30-dekabr.
  12. ↑ „Portugal 4–0 Liechtenstein: Cristiano Ronaldo scores twice as he celebrates becoming most capped men's international player“. BBC Sport. 2023-yil 24-martda asl nusxadan arxivlangan. Qaraldi: 2023-yil 24-mart.
  13. ↑ „الصراع مع كريستيانو رونالدو يشتد .. قرار جديد من فيفا يقرب بدر المطوع من استعادة لقب "عميد لاعبي العالم"“ (ar). Goal.com (2025-yil 5-oktyabr).
  14. ↑ الغانم يقلد العقيد بدر المطوع رتبته الجديدة (Wayback Machine saytida 10 September 2021 sanasida arxivlangan) Al Rai, 27 July 2021

Havolalar