Jump to content

Azkamar

From Ziyosfera
Revision as of 20:01, 7 August 2026 by Programmer (talk | contribs) (Oʻzbekiston Milliy Ensiklopediyasi (OʻZME) loyihasidan 100% asl holatida import qilindi.)
(diff) ← Older revision | Latest revision (diff) | Newer revision → (diff)

Azkamar – Ziyovuddin togʻlarining janubi-gʻarbiy qismidagi plato. Shimolida Malik choʻli (Qiziltepa platosi), janubida Qarnob choʻli bilan tutashgan. Mutlaq balandligi 300–350 m. Azkamar neogenning oqchagil va apsheron yaruslari (kosontov, sadivar svi-talari)ning alevrolit, gil va ular orasidagi qumtosh va gravelitlardan (1–3 m) tashkil topgan. Azkamarning yuzasi quyi toʻrtlamchi davrning allyuvial-prolyusvial jinslari (Azkamar majmuasi)dan tuzilgan. Azkamarning shimoliy yon bagʻri qiyaroq, janubiy esa tik, suvayirgʻich qismida egarsimon botiq boʻlib, yon bagʻirlarida kuestasimon shaklda jarliklar hosil boʻlgan. Azkamarning sharqiy qismi – Ziyovuddin togʻlariga tutashgan joy relefi juda oʻydim-chuqur. Azkamarda shoʻrtob boʻz qoʻngʻir tuproqlar tarqalgan, oqjusan oʻsadi. Azkamar yaylovlarida qorakoʻl qoʻylari boqiladi.

Adabiyotlar

  • OʻzME. Birinchi jild. Toshkent, 2000-yil