Jump to content

Kseroderma

From Ziyosfera
Revision as of 20:20, 7 August 2026 by Programmer (talk | contribs) (Oʻzbekiston Milliy Ensiklopediyasi (OʻZME) loyihasidan 100% asl holatida import qilindi.)
(diff) ← Older revision | Latest revision (diff) | Newer revision → (diff)

Kseroderma, pigmentli kseroderma (yunoncha: „xeros“ – quruq va derma) — terining nasldan-naslga oʻtadigan tugʻma kasalligi; dermatozlarta kiradi. Bunda teri quyosh nuri (ultrabinafsha nur)ga oʻta sezgir boʻladi. Asosan, bola hayotining birinchi yillaridayoq namoyon boʻladi. Oftob badanning ochiq joylariga (yuz, qoʻl-oyoqqa) tushganidan keyin, u yerda eritematoz (qarang Eritema) va pigmentli dogʻlar paydo boʻla boshlaydi: teri quruqshab, qazgʻoqlaydi, bora-bora teri yupqa tortib, burishadi (burun qirralashib, ogʻiz tortishib qoladi), konʼyunktivit, koʻz qovoqlarining qayrilib qolishi va hokazolar kuzatiladi. Bolaning yoshi kattalashgan sayin (8—10 yoshlarda) terisida soʻgalsimon yoki papillomatoz oʻsimtalar paydo boʻlib, epiteliomalar (rak, bazalioma, melanoma va boshqalar) ga aylanishi mumkin (qarang Papilloma). Bemorga kortikosteroidlar, vitaminlar, rentgenterapiya buyuriladi, baʼzan jarrohlik usuli qoʻllanadi[1].

Manbalar

  1. ↑ OʻzME. Birinchi jild. Toshkent, 2000-yil