Jump to content

Iqbal Baraka

From Ziyosfera
Iqbal Baraka
Tavalludi 1942 (yoshi 83–84)
Qohira, Misr
Taʼlimi Iskandariya universiteti
Qohira universiteti

Iqbal Baraka (اقبال بركة (arab tili); 1942-yilda tugʻilgan) — misrlik jurnalist, ayollar huquqlari faoli va yozuvchi. Iqbal yigirma yildan ortiq vaqt davomida ayollar uchun moʻljallangan „Hawaa“ jurnalining bosh muharriri boʻlib xizmat qilgan. Baraka Misr hamda islom jamiyatida ayollarning oʻrnini oshirishga qaratilgan faoliyati bilan tanilgan. U Arab dunyosidagi eng taʼsirli feministlardan biri sifatida eʼtirof etiladi[1].

Ilk hayoti va taʼlimi

Baraka 1942-yilda Misrning Qohira shahrida tugʻilgan.[1]. U Qohiraning Al-Zahir tumanida joylashgan liberal, oʻrta tabaqali oilada oʻsib-ulgʻaygan. Oilada uning mutolaa qilishiga hamda taʼlim olishiga doimiy ragʻbat berib kelingan[2].

U 1962-yilda Iskandariya universitetining ingliz tili yoʻnalishi boʻyicha bakalavr darajasini olgan. Keyinchalik, 1979-yilda Qohira universitetida arab adabiyoti boʻyicha ikkinchi bakalavr darajasiga ega boʻlgan[1]. Qohira universitetida tahsil olish jarayonida u Qurʼon va hadislarda ayol kishining oʻrni hamda rolini atroflicha oʻrgangan[3].

Faoliyati

Iskandariya universitetiini tamomlagach, Baraka Philips koʻpmillatli konglomeratida jamoatchilik bilan aloqalar sohasida ishlagan. Keyinchalik ushbu ishni tark etib, tarjimon sifatida faoliyat yuritgan. Soʻngra ingliz tili oʻqituvchisi lavozimida ishlash uchun Quvaytga koʻchib oʻtgan[4].

Misrga qaytgach, u ingliz tilidagi radioda jurnalist sifatida oʻz faoliyatini boshlagan. Keyinchalik Rose al-Yūsuf media guruhiga qarashli „Sabah El Kheir“ („Xayrli tong“) jurnalida muharrir boʻlib ishlay boshlagan[1][5]. Ushbu lavozimda ishlash jarayonida u inson huquqlari hamda islomda ayolning oʻrni masalalarida islom mutafakkirlari bilan tez-tez munozaralarga kirishgan[2].

1993-yilda u ayollar uchun moʻljallangan „Hawaa“ jurnaliga bosh muharrir etib tayinlangan. Uning asosiy maqsadi faqat uy bekasi boʻlish sirlariga eʼtibor qaratib kelgan ushbu konservativ nashrni siyosat, inson huquqlari va ayollar haqidagi maqolalar manbasiga aylantirish edi[6]. Keyinchalik u oʻzining qarashlarini shunday taʼriflagan: „Men ayollarni shunchaki moda dizaynerlari va manikyurchilarning vositasi emas, balki biz hal qilishimiz kerak boʻlgan haqiqiy va jiddiy manfaatlar va tashvishlarga ega, degan qarashni asosiy mezon deb bilaman“[5]. U jurnalidagi lavozimidan gender tengligini doimiy ravishda targʻib qilish uchun foydalanib kelgan[7][4]. Baraka jurnalni 20 yildan ortiq vaqt davomida, yaʼni 2014-yilgacha boshqargan[7][8].

Manbalar

  1. ↑ 1,0 1,1 1,2 1,3 „Ekbal Baraka“. Arab World Books. Qaraldi: 2020-yil 22-oktyabr.
  2. ↑ 2,0 2,1 Al-Refaie, Youssef. Secrets of Egyptian Creative Women. Das Lamar Publishing House, 2019. 
  3. ↑ Alsharif, Asma „Renowned writer fights for women's rights in Islam“. The Caravan (2006-yil 19-noyabr). Qaraldi: 2020-yil 22-oktyabr.
  4. ↑ 4,0 4,1 Arab women writers : a critical reference guide, 1873-1999, ʻĀshūr, Raḍwá,, Ghazoul, Ferial Jabouri, 1939-, Reda-Mekdashi, Hasna,, McClure, Mandy, Cairo, Egypt, November 2008. ISBN 978-977-416-267-1. OCLC 503115837. 
  5. ↑ 5,0 5,1 Fernea, Elizabeth Warnock, 1927-2008.. In search of Islamic feminism : one woman's global journey. New York: Doubleday, 2010. ISBN 978-0-307-77385-2. OCLC 773582885. 
  6. ↑ „All about Eve“ (en-US). Chicago Tribune (1993-yil 25-iyul). Qaraldi: 2020-yil 21-oktyabr.
  7. ↑ 7,0 7,1 „Femnists in Egypt“. Ahl AlQuran. Qaraldi: 2020-yil 21-oktyabr.
  8. ↑ „Media Monitor Egypt - 13“. Al Sawt Al Hurr Arab Network for Media Support (june–august 2014). 2020-yil 19-sentyabrda asl nusxadan arxivlangan.