Atavizm

Атавизм (лотинча: атавус — „аждод“) — муайян турнинг айрим организмларида унинг узоқ аждодларида мавжуд бўлган, бироқ эволюция давомида йўқолиб кетган белгилар пайдо бўлиши. Отларда учта бармоқ бўлиши, кўп эмчакли, думли ёки бутун бадани жун билан қопланган болалар туғилиши атавизмга мисол бўлади. Атавизмнинг онтогенезда пайдо бўлиши мазкур белгини юзага келтирадиган генларнинг тур эволюциясида сақланиб қолганлиги, бироқ нормал ривожланаётган организмда улар та’сирининг йўқолиши билан боғлиқ. Жуда кўп авлодлардан сўнг турнинг айрим организмлари онтогенезида генлар та’сирини йўқотиб турадиган тўсиқ йўқолиши туфайли мазкур белги қайтадан юзага чиқиши мумкин. Атавизм турнинг аждодини кўрсатиб беради, шунинг учун Дарвин Атавизм ҳодисасини эволюциянинг далилларидан бири деб исбот этган. Атавизм айрим организмларда пайдо бўлиши билан рудиментлардан фарқ қилади.

Адабиётлар

• ЎзМЕ. Биринчи жилд. Тошкент, 2000-йил.