Azor orollari

Азор ороллари (португалча Илҳас дос Аcорес — Қарчиғайлар ороли) — Атлантика океанининг шимолий қисмидаги архипелаг. Пиренея ярим оролдан ғарбда. Португалия таркибида. 9 та йирик орол ва келиб чиқиши вулканик бўлган бир қанча рифлардан иборат. Ғарбдан шарққа қарийб 600 км га чўзилган. Майдони 2,3 минг км². Релефи тоғли, баландлиги 2351 м гача (Пику о.даги Пику тоғи). Тез-тез зилзила бўлиб туради. Иссиқ ва қайноқ сувли ҳамда минерал булоқ кўп. Иқлими субтропик, денгиз иқлими; январнинг ўртача температураси 14°, июлнинг температураси 22°; йиллик ўртача ёғин 800 мм чамасида. Тоғ ён бағирлари ўрмонлар билан қопланган, маквис чакалакзорлари бор. 1431–1453 йилларда Азор оролларига португаллар бориб ўрнашган. Аҳоли ситрус ўсимликлар ўстириш, токчилик, ананас, банан етиштириш билан шуғулланади. Азор ороллари Транс-Атлантика ҳаво ва денгиз йўллари кесишган жойда. Асосий портлари: Пон-та-Делгада, Орта.

Адабиётлар

• ЎзМЕ. Биринчи жилд. Тошкент, 2000-йил