Botirbek Hasanov
| Ботирбек Ҳасанов | |
|---|---|
 | |
| Таваллуди |
14-декабр 1940-йил Янгийўл, Тошкент вилояти, Ўзбекистон ССР |
| Фуқаролиги |
 Ўзбекистон |
| Касби | филолог |
| Соҳаси | навоийшунослик |
| Иш жойлари | Ўзбекистон Фанлар академияси Алишер Навоий номидаги давлат адабиёт музейи |
| Таълими | Тошкент давлат университети |
| Илмий даражаси | филология фанлари доктори |
| Илмий унвони | профессор |
Ботирбек Рустамович Ҳасанов (1940-йил 14-декабр, Янгийўл, Тошкент вилояти, Ўзбекистон ССР ) — ўзбекистонлик олим, навоийшунос, филология фанлари доктори, профессор.
Биографияси
Ботирбек Ҳасанов 1940-йилнинг 14-декабрда Янгийўл шаҳрида туғилган[1]. 1957-йилда Тошкент давлат университетининг шарқ факултетининг араб бўлимига ўқишга киради. Мазкур факултетни 1962-йилда битириб, шу йилдан 1970-йилгача араб тилига ихтисослашган ўрта мактабда араб тилидан дарс берган. 1970-йилдан Ўзбекистон Фанлар академияси Алишер Навоий номидаги давлат адабиёт музейида аввал кичик илмий ходим, кейинчалик бўлим бошлиғи лавозимларида ишлаган. Ботирбек Ҳасанов бошчилигида республиканинг турли вилоятларига уюштирилган илмий археографик экспедицияларда ўзбек адабиёти ёдгорликларини халқ орасидан тўплаш, қўлёзмалар фондини бойитиш, қўлёзма меросни ўрганиш, қўлёзма ва тошбосма асарларни тўплаш, уларни бирламчи ишловдан ўтказиш, илмий тавсифини тузиш ишлари амалга оширилган. Натижада, музей фондига минглаб қўлёзма ва тошбосма асарлар тўпланди. Уларнинг илмий каталоглари чоп этилди. Ботирбек Ҳасанов 1974-йилда „Алишер Навоийнинг „Саб’ат абҳур“ луғати (филологик тадқиқот)“ мавзусида номзодлик диссертациясини ҳимоя қилган. 1990-йилда „Принципы составления рукописных словарей к произведениям Наваи“ мавзусида докторлик ишини ҳимоя қилган. 1993-йилда „Фан“ нашриёти томонидан „Навоий асарлари учун қисқача луғат“ китоби нашр қилинган. 1996-йилда „Мовароуннаҳр“ нашриёти томонидан „Арабча-ўзбекча бошланғич луғат“ ва 1995-йилда Ғафур Ғулом номидаги адабиёт ва санъат нашриёти томонидан „Қур’они Карим сўзларининг арабча-ўзбекча кўрсаткичли луғати“ китоблари нашр қилинган. 2000-йил Абдулла Қодирий номидаги халқ мероси нашриёти орқали „Рисолайи Азиза“ — „Сабот — ул ожизин“ шарҳи китобини чоп эттирди. Бу китобда ислом ақидалари Қур’они Карим ва суннат талаблари асосида, баён қилинган. Сўфи Оллоёрнинг „Сабот —ул ожизин“ асарининг ҳозирги замон тилида кенг китобхонлар оммаси тушуна оладиган ҳолатдаги шарҳи амалга ошди. Олим вафотидан сўнг амалга оширган изланишлари учун Халқаро Бабтин мукофоти (Қувайт) билан мукофотланди[1].