Daimler-Benz

Даимлер-Бенз – етакчи немис автомобил консерни. 1926-йилда Готтлиб Даймлер ва Карл Бенс томонидан Германиянинг Штутгарт шаҳрида ташкил этилган. Асосан енгил ва юк автомобиллари, оғир юк тортувчи тягачлар, кичик ва катта йўловчи автобуслар, микроэлектроника, авиааппаратлар, авиадвигателлар ва б. ишлаб чиқаради. Мерседес-Бенс АГ (енгил ва юк автомобиллари ишлаб чиқариш, савдо ва автосервис), Даймлер-Бенс Индустри — "АЕГ" (микроэлектроника, дизел куч агрегатлари, автоматлаштириш учун техника, телемеханика воситалари ва б.), Даймлер-Бенс Аэроспейс — "Даза" АГ (авиация, космонавтика, ҳарбий ва фуқаро сунъий йўлдошлари тизими ва б.) ва Даймлер-Бенс Интер Сервис — "Дебис" (молиявий хизматлар кўрсатиш, сугурта, маркетинг хизмати, коммуникация ва алоқа хизмати, халқаро савдо, кўчмас мулк менежменти) компаниялари консерн таркибига киради. Бразилия, Аргентина, АҚСҲ, Хитой, Туркия, Испания, Италия сингари дунёнинг 23 давлатида ўз корхоналарига эга.

1993-йил "Мерседес-Бенс АГ" компанияси билан ҳамкорликда Ўзбекистонда юк автомобиллари ишлаб чикарадиган "Хоразм ишлаб чиқариш бирлашмаси" қўшма корхонаси ташкил этилди. 1996-йил Тошкент ш.да "Д.-Б.АГ"нинг Мар-казий Осиё бўйича ваколатхонаси очилди. 1998-йил "Д.-Б.АГ" Американинг гигант корпорацияси "Крайслер" билан қўшилиши натижасида дунё автомобилсозлигида етакчи компания "Даймлер-Крейслер" ташкил этилди. Йиллик савдо обороти 124 млрд. немис маркаси. "Д.-Б.АГ"нинг дунё бўйича корхоналарида 300 мингдан ошиқ ишчи-хизматчи ишлайди (1998).

Ҳамид Азизқориев.

Адабиёт

• ЎзМЕ. Биринчи жилд. Тошкент, 2000-йил