Dakar

Дакар — Сенегал пойтахти. Ғарбий Африканинг муҳим саноат, транспорт ва савдо-молия марказларидан. Яшил Бурун яриморолида, муҳим денгиз йўллари кесишган ерда жойлашган. Иқлими субекваториал; январнинг ўртача температураси 22°, июлники 28°. Йиллик ўртача ёғин 572 мм. Аҳолиси 2 млн. киши (1998), 90% африкаликлар; европаликлардан асосан франсузлар яшайди.

Дакарни 1857-йилда франсузлар қалъа сифатида бунёд этган. 1895—1960-йилларда Франсия мустамлакаси Сенегалнинг, 1904—59-йилларда Франсия Ғарбий Африкасининг маъмурий маркази. 1960-йилдан Сенегал пойтахти.

Дакар ва унинг атрофида мамлакат саноат корхоналарининг 80% жойлашган. Саноат корхоналари асосан қишлоқ хўжалиги маҳсулотларини қайта ишлайди. Дакарда ер ёнғоқ ёғи ишлаб чиқарувчи йирик заводлар мавжуд. Балиқ консерва, пиво ва ун заводлари, тамаки, гугурт, йигирув ва тўқимачилик фабрикалари, кемасозлик, нефт, семент, совун ва кимё корхоналари, иссиқлик электр стансияси бор. Йирик денгиз порти. Дакар орқали четга ер ёнғоқ ва унинг ёги, фосфат чиқарилади. Аэропорти халқаро аҳамиятга эга. Дакарда университет (1950), политехника институти, Африкани ўрганиш институти, Пастер институти, санъат мактаби, университет кутубхонаси, музейлар, театр, ҳайвонот боғи ва бошқалар бор.

Адабиётлар

• ЎзМЕ. Биринчи жилд. Тошкент, 2000-йил