Diffuzion apparat

Диффузион аппарат (диффузор экстратор) — майдаланган қаттиқ материалдан суюкликда эрийдиган моддаларни экстраксия усули билан ажратиб оладиган аппарат. Кимё ва озиқ-овқат саноатида, асосан, қанд и.ч.да кенг ишлатилади. Қанд и.ч. аппаратларида майдаланган қанд лавлаги ёки шакарқамишдан олинган қанд моддаларни сувда экстрация қилиш (сиқиш) усулидан фойдаланилади. Д.а.нинг узлукли (даврий) ва узлуксиз ишлайдиган хиллари бўлади. Узлукли ишлайдиган Д.а. бир-бири билан ҳалқа тарзда бириктирилган жуфт (12— 16 та) диффузор ва шунча оралиқ иситкичлардан ташкил топган диффузион батареялардан иборат. У ишчилар сони кўп бўлишини талаб қилади. Шунинг учун узлуксиз ишлайдиган Д. а. кўпроқ ишлатилади. Тик ўрнатилган бир ва кўп колоннали, қия теганали, горизонтал ротацион Д.а. кўп тарқалган. Вертикал колоннали Д.а. да майдаланган маҳсулот шнек, парракли ёки занжирли транспортёрлар билан пастдан юқорига кўтарилади ва турп кўринишида аппаратнинг юқориги қисмидан солинади. Сув эса юқоридан пастга қараб узлуксиз оқиб, турплар орасидан ўтади ва диффузион шарбат колоннанинг пастки қисмидан олиб кетилади. Жараён шу тарзда узлуксиз давом этади.

Адабиёт

• ЎзМЕ. Биринчи жилд. Тошкент, 2000-йил