Dustlar

Дустлар (инг. дуст — чанг) — кукун шаклидаги пестицидлар. Экинларга тушган зараркунандалар, бегона ўтларга қарши сепилади, уруғларни упалашда ишлатилади. Инсектицид, фунгицид, акарицид ёки гербициднинг инерт тўлдиргич билан оддий аралашмасидан иборат. Тўлдиргич сифатида талк, пирофилит, бўр, каолин, трепел, сили-кагел ва ҳар хил таркибли тупроқдан фойдаланилади. Кўпинча пирофилит ва талк қўшилади, чунки улар ўсимликка яхши ёпишади. Д. чангининг учиб кетишини камайтириш учун 3—5% ли минерал мой аралаштирилади (қаранг Минерал мойлар). Суғорма деҳқончилик минтақаларида кемирувчи зараркунандалар (кузги тунлам, симқуртлар ва б.), ўргимчакканага қарши (олтингугурт кукуни) курашда яхши натижа беради.

Адабиёт

• ЎзМЕ. Биринчи жилд. Тошкент, 2000-йил