Ebonit

Эбонит (юн. — қора дарахт), қаттиқ резина — табиий ёки сунъий каучукни олтингугурт (каучук массасига нисбатан 30—50%) билан вулканизациялашдан ҳосил бўлган маҳсулот. Эбонитда боғланган олтингугурт 32% га яқин, формуласи (С6Н95)2. Эбонит қўнғир ёки қора тусли; зичлиги 1140 кг/м3, механик ишловга осон берилади, гигроскопик эмас, газларни сингдирмайди, кислота ва ишқорлар таъсирига чидамли, углерод сулфид ва нефт маҳсулотларида эримайди, парафинда 300° дан юқори даражада эрийди. 70— 80° да юмшайди, совиганда яна қаттиқлашади, 200° дан юқори даражада эримай кўмирга айланади.

Эбонит тайёрлаш учун ниҳоятда тоза каучук ишлатилади. Тўлдиргич сифатида эбонит кукуни, талк, пемза, оқ қурум ва бошқалар ишлатилади. Қора тусли эбонитга оз миқдорда (3—5%) қурум қўшилади. Эбонит, асосан, электротехника маҳсулотлари, кислота ва ишқорлар учун идишлар тайёрлашда қўлланади.