Eski machit

„Эски мачит“ – Қарши шаҳридаги театр. 1992-йил „Мулоқот“ театр студиясидан ажралиб чиқиб, театр студияси сифатида иш бошлаган. Абдунаби Бобожонов, Исъҳоқ Тўраев, Ойгул Халилова, Ботир Қурбонов, Гулноза Раҳматова, ҳаваскор созанда ва хонандалар труппа асосини ташкил этган. „Эски мачит“ театрининг биринчи асари „Меҳрибонгинам“ (Ш. Шоманадзе асари) спектаклидаёқ труппанинг муҳим ижтимоий муаммоларни янги услубдаги теран саҳнавий талқинларда ёрқин ва таъсирчан ижроларда акс эттиришга бўлган интилиши кўринди. Спектакл „Наврўз-95“ фестивалида 1-ўринни олди. Театр янгича фикрлайдиган новатор режиссёрларни таклиф этиб, шу пайтгача ҳеч ким эътибор бермаган манбалар асосида мураккаб саҳна асарлари яратиш, янги талкин услуби ва воситалар излаб топиш, томошабинни воқеаларнинг иштирокчисига айлантириш йўлидан борди. 1995-йил режиссёр Фаррух Қосимов Фаридиддин Атторнинг „Мантиқ уттайр“, Навоийнинг „Лисон уттайр“ асарлари асосида „Шайх Санъон“ ва „Тарсо духтар“ни саҳналаштирди. 1998-йил Украинанинг Харков шаҳрида ўтган „Шарқ экспресси“ халқаро театр фестивалида „Аёл алвасти ёки ҳароратли айиқ“ спектакли 1-ўринни олган. 1999-йил Ч. Айтматовнинг „Асрга татигулик кун“ асари асосида саҳналаштирилган „Найман она қиссаси“ спектакли „Наврўз-99“ республика фестивалида алоҳида соврин, Бишкек (Қирғизистон)да ўтган „Ч.Айтматов ва театр“ халқаро фестивалида энг олий соврин – Гранприни қўлга киритди. Шунингдек, „Қобил ва Ҳобил“, „Рақсу самоъ“ каби спектакллар ҳам турли мукофотларга сазовор бўлди. „Чияли бозордаги ҳангома“, „Мўжизавий дарахт“, „Манқуртларга берманг дунёни“ каби театрлашган томошалари ҳам муваффақият қозонди.

Театрнинг бадиий раҳбари ва бош режиссёри – Исъҳоқ Тўраев.