Fan nomzodi

Фан номзоди – Ўзбекистон ва айрим собиқ совет мамлакатларида бериладиган илмий даража. Олий ўқув юртлари ва илмий тадқиқот институтлари кошидаги ихтисослашган илмий кенгашлар томонидан номзодлик имтиҳонларини топширган, фаннинг долзарб муаммолари бўйича мустақил ёзилган диссертация тадқиқот ишини ҳимоя қилган олий маълумотли шахсларга берилади. 1934-йилда таъсис этилган. Фан номзоди илмий даражасини олиш учун ёзилган диссертациялар Ўзбекистон Республикаси Вазирлар Маҳкамаси ҳузуридаги Олий аттестация комиссияси томонидан назорат тариқасида кўриб чиқилади ва Фан номзоди илмий даражасини тасдиқловчи диплом берилади. Фан номзоди олий ўқув юрти ёки илмий тадқиқот институтларида доцент, катта илмий ходим, кафедра, бўлим, лабаратория мудири лавозимларини эгаллаш учун танловларда қатнашиш ва фан доктора илмий даражасини олиш учун ёзилган диссертацияни ҳимоя қилиш ҳуқуқига эга. Фан номзоди илмий даражасини олиш учун диссертация аспирантура таълими даврида ёки мустақил равишда ёзилади. Диссертацияда янги илмий ва амалий хулоса ҳамда тавсиялар берилиши, тадқиқотчининг мустақил илмий ишлар олиб бориш қобилияти намойиш этилиши, фаннинг мазкур соҳасидаги назарий билимдонлиги акс этиши лозим. Фан номзоди илмий даражасини олиш учун ёзилган диссертациянинг асосий ғоялари қатор илмий-назарий ва амалий йўналишдаги мақолаларда, тавсия ва қўлланмаларда ўз ифодасини топмоғи керак. Диссертациянинг ҳимояси олий ўқув юртлари ва илмий тадқиқот институтлари қошидаги бирлашган ихтисослаштирилган илмий кенгашларда амалга оширилади. 2002-йил Ўзбекистонда илм-фаннинг турли соҳаларида 8904 Фан номзоди фаолият юритди.

Яна қаранг

• Аспирантура