Georg Skanderbeg

СКАНДЕРБЕГ (Сcандербег, Скендербеу) Георг Кастриоти (Кастриоти) (тахминан 1405—1468.17.1) — албан халқининг усмонли турклар асоратига қарши озодлик кураши раҳбари, Албаниянинг миллий қаҳрамони. Княз Кастриоти хонадонига мансуб бўлган. Гўдаклигида турк султони Мурод ИИ га гаровомонат қилиб берилган, кейинчалик унинг қўшинида хизмат қилган. Саркардалик иқтидори туфайли бей унвонини ва Искандар Макдуний шарафига Искандар (Искандарбей ёхуд бузилган шаклда — С.) номини олган. Султонга қарши курашиш учун яширин суратда тайёргарлик кўрган, унинг ички ва ташқи душманлари билан алоқа ўрнатган, Я. Хуняди билан музокаралар олиб борган. Ниш яқинидаги жангда (1443-йил 3 ноябр) венгер қўшинлари султон қўшини устидан ғалаба қозонгандан сўнг, С. 300 суворий билан турклар қароргоҳини тарк этиб Дибруга келган ва озод деҳқонларни турк мустамлакачиларига карши озодлик кураши га даъват этган. Петреля, Петралба, Стелюши, Торчан, Светиград қалъаларидан турк гарнизонларини кувиб юборган. Албан мулкдорларини бирлаштиришга ҳаракат қилган, кўнгилли халқ лашкарларини асосини деҳқонлар ташкил этган мунтазам армияга айлантирган. С. раҳбарлигида албан халқи 24 йил мобайнида усмонийларга қаршилик кўрсатган. С. Леж шаҳрида вафот этган. Албанияда унинг номида орден таъсис этилган. Тиранадаги марказий майдон С. номи билан аталади.