Gidrostatika

Гидростатика — гидроаэромеханиканинг суюқлик мувозанатини ва унга ботирилган жисмга сокин суюқликнинг таъсирини ўрганадиган бўлими. Асосий масалаларидан бири суюқликда босимнинг тақсимланиши (тарқалиши)дир. Босимнинг тақсимланишини билган ҳолда гидростатика қонунлари асосида суюқликка ботирилган жисмларга, мас, сув ости кемасига, тўғон деворига сокин суюқлик томонидан кўрсатиладиган таъсир кучларини ҳисоблаш мумкин. Хусусан, жисмларнинг суюқлик сиртида ва ичида сузиш шартларини, шунингдек сузаётган жисмларнинг устуворлик шартларини аниқлаш лозим. Бу ҳол кемасозликда муҳимдир. Гидравлик пресс, гидравлик аккумулятор, суюқлик манометри, сифон ва б. машиналар ҳамда асбобларнинг ишлаши гидростатика қонунларига, хусусан Паскал қонунига асосланади. Гидростатиканинг асосий қонунларидан бири — Архимед конуни бўлиб, у суюқлик ва газга ботирилган жисмга таъсир қилувчи итариш кучлари катталигини белгилаб беради.

Адабиётлар

• ЎзМЕ. Биринчи жилд. Тошкент, 2000-йил.