Gimenolepidlar

Гименолепидлар (Нуте нолипидидаэ) — тасмасимон чувалчанглар синфининг оиласи. Баъзи паррандалар ва сут эмизувчиларда паразитлик қилади. Одамда Ҳйменолепис папа ва Н. диминута учрайди. Г.нинг вояга етган танаси, яъни стробиласининг уз. 2—3 см дан 4—5 см гача, катта бўғимининг кенглиги 0,5–1 мм, боши (сколекси)нинг диаметри 0,25—0,3 мм. Сколексида тўртта сўрғич ва ҳаракатчан ҳартумча бўлади. Ҳартумча ичида 20 та илгаги бор. Г.нинг тухуми эллипс, баъзан шарсимон шаклда, 0,068 мм гача бўлади. Одамда паразитлик қиладиган турлари ингичка ичакда оралиқ хўжайинсиз ривожланади. Тухумдан 6 илгакли онкосфера личинкаси чиқади. Личинка ичак ворсинкасига кириб, 5—8 кунда сўрғичли ва илгакли иккинчи личинкалик даври — систицеркоидга айланади. Систицеркоид ичак ворсинкаларидан ичак бўшлиғига чиқиб вояга етади. Паррандаларда паразитлик қиладиган Г.нинг оралиқхўжайинлари ҳалқали чувалчанглар, моллюскалар, қисқичбақасимонлар ва ҳашаротлар ҳисобланади.

Адабиётлар

• ЎзМЕ. Биринчи жилд. Тошкент, 2000-йил