Guyukxon

Гуюкхон (1205-48) - мўғуллар империясининг улуғ қони (1246—1248). Ўқтойхон (Угедай) (1186— 1241)нинг тўнғич ўғли. Чингизхоннинг набираси. 1236—1241-йил мўғул шаҳзодаларининг Ботухон бошчилигида Россия ва Шарқий Европага қилган босқинчилик юришларида қатнашган. Лекин отасининг вафотини (1241-йилмарт) эшитиб, шошилинч равишда ўз юртига қайтиб келган. 1246-йил сентябрда Қорақурумда бўлиб ўтган Чингизхон авлодлари қурултойида Гуюкхон қонлик тахтига ўтқазилган. Отаси вафотидан кейин ўтган 5 йил мобайнида давлатни онаси Туракина хотун бошқариб турган. Гуюкхон ҳукмронлик даврида Кавказнинг жанубий шарқий қисми, Кореянинг бир қисми босиб олинган. Хитой ва Эронни босиб олиш учун кураш давом эттирилган. Чиғатой улусинаиг ички ишларига аралашган. Гуюкхон Олтин Ўрда ҳукмдори Ботухонга қарши урушга отланиб йўлга чиққанда тўсатдан вафот этган.

Адабиётлар

• ЎзМЕ. Биринчи жилд. Тошкент, 2000-йил