Inadaptatsiya

Инадаптация (лотинча: ин — инкор қўшимчаси ва адаптация) — организмлар айрим гуруҳларининг ўзгарган муайян муҳит шароитига мослашмаганлиги. Эволюсия жараёнида пайдо бўлган, лекин мукаммаллашмаган органларнинг бўлиши кейинчалик ин-адаптив организмларнинг қирилиб кетишига сабаб бўлади. И.га мисол тариқасида кўпчилик туёқли сут эмизувчилар скелети, хусусан, бўғимларида ҳаракатланиш усулининг ўзгариши билан пайдо бўлган мукаммаллашмаган ўзгаришларни кўрсатиш мумкин. И. терминини рус палеонтологи В. О. Ковалевский фанга киритган (1873). У казилма ҳолда топилган туёқлиларнинг оёқ скелетини адаптив (мослашган) ва инадаптив (мослашмаган) типларга ажратган. Дастлаб инадаптив, кейинроқ адаптив типга эга организмлар пайдо бўлган. Кейинчалик 1-типдаги организмларни адаптив организмлар сиқиб чиқарган. Масалан, бўр даврида халтали сут эмизувчилар кенг тарқалган, кейинчалик палеоген ва неоген даврларида уларни деярли ҳамма жойда (Австралия, Жан. Америкадан ташқари) анча мукаммал тузилган йўлдошлилар сиқиб чиқарган.