Ivan Umnyakov
| Умняков Иван Иванович | |
|---|---|
| Таваллуди |
9-август 1890-йил Петрозаводск, Россия империяси |
| Вафоти |
22-феврал 1976-йил Самарқанд вилояти, Ўзбекистон ССР, СССР |
| Таълими | Санкт Петербург давлат университети |
Умняков Иван Иванович (1890-йил 9-август, Петрозаводск, Россия империяси – 1976-йил 22-феврал, Самарқанд вилояти, Ўзбекистон ССР, СССР) – совет шарқшуноси, арабшуноси, исломшуноси ҳамда тарихчи олим. Санкт-Петербург давлат университети профессори, Ўрта Осиё географлар жамияти доимий аъзоси[1]. Россия Совет Федератив Социалистик Республикасининг Бухородаги ваколатхонаси раҳбари (1918).
Биографияси
Умняков Иван Иванович 1890-йил 9-август куни Россия империясига қарашли бўлган Петрозаводск шаҳрида ҳарбий оиласида туғилган. У 1901-йилдан 1909-йилгача Санкт Петербург гимназиясида таҳсил олади. Гимназияни кумуш медалга тугатганидан сўнг, Санкт Петербург университетининг шарқ тиллари факултетига қабул қилинади. Ушбу факултетда устозлари Шмидт, Медников, Крачовский, Жуковский, Смерников ва бошқалардан шарқ мамлакатнинг тарихи, маданияти ва қадриятлари ҳақидаги билимларни олди. Университетнинг махсус топшириғи билан Иван Умняков „Наршахий ва араб географларининг Бухоро топографиясида қўшган ҳиссаси“ мавзусида маълумот тўплагани Бухорога боради. Топшириқни муваффақиятли якунлагандан сўнг, олтин медал билан тақдирланади. Санкт Петербург университетининг 1914-йил қизил диплом билан тамомлагандан сўнг, Ташқи ишлар вазирлиги ўқув муассасасида таҳсилини давом эттиради. Иван Умняков 1916-йил Россия сиёсий агентлигининг таркибини кенгайтириш мақсадида Бухорога юборилади. 1918-йил Туркистон комиссарининг тавсиясига асосан, Россия Совет Федератив Социалистик Республикасининг Бухородаги ваколатхонаси раҳбарлигига тайинланади[2]. У 1920-йилгача Бухорони янада пухта ўрганишга киришиб, у ернинг тарихий қўлёзмалари билан танишиб чиққан.
Иван Умняков 1944-йил сентябр ойида Ўзбекистон давлат университети (ҳозирги Самарқанд давлат университети) ташкил қилингач, тарих кафедрасида доцент лавозимида ишлайди. 1945-йилдан 1949-йилгача „Ўрта Осиё ва Шарқ тарихи“ кафедрасида мудир бўлиб фаолият юритади. Иван Умняков 1974-йил 24-сентябрда Самарқанд давлат университетининг „Ўзбек халқлари тарихи“ кафедрасида профессор бўлиб ишлайди.
Иван Умняков 1976-йил 22-февралда Самарқанд вилоятида вафот этади.
Манбалар
- ↑ „Умняков Иван Иванович (1890)“. ру.опенлист. Қаралди: 12-сентабр 2023-йил.
- ↑ „УМНЯКОВ, Иван Иванович / / [23.06.1890 - 21.02.1976“]. сентрасия.орг. Қаралди: 12-сентабр 2023-йил.