Kalahari

Калаҳари — Жанубий Африканинг марказий қисмидаги чала чўлли табиий ўлка. Боцвана, ЖАР, Намибия, Замбия, Зимбабве, Ангола ҳудудида. Узунлиги 2000 км чамасида, кенглиги 1200 км дан зиёд. Майдони - 630 минг км². Плато ва ясситоғлар билан ўралган эол релеф шаклига эга ботиқдан иборат. Шимолида Конго-Замбези сувайирғичи, жанубида Оранж дарёси водийси билан чегараланади. Ер юзаси бир оз паст-баланд, кўп қисми қум билан қопланган бўлиб, бал. 900–1000 м. Иқлими тропик ва субекваториал иқлим, ўртача температураси ёзда 24—26°, қишда 12—18°. Йилига 150 мм дан 1000 мм гача ёғин ёғади (энг кўп ёғин декабр—феврал ойларига тўғри келади). Дарё кам. Шўр сувли саёз кўл ва ботқоқлик кўп. Тупроғи жигарранг-қизил, латерит, қизил-қўнғир тупроқ. Ўсимлик дунёси — шимолида саванналардан, жанубида чўл ва чала чўл ўсимликларидан иборат. Катта қисмида ўсимлик умуман ўсмайди. Ҳайвонот дунёси Эфиопия областининг Африка кичик областига мансуб. Аҳолининг асосий қисми овчилик ва чорвачилик билан шуғулланади. К.нинг жан. қисмида товар маҳсулот берувчи чорвачилик ривожланган, айрим ерларда деҳқончилик қилинади. Калахари ҳудудида Этоша-Пан миллий парки ташкил этилган.