Kaptaj

Каптаж (лот. cапто — ушлайман, тутаман) — ер ости сувларини очиш, уларни ер юзасига чиқариш ва муайян муддат давомида тургун (оптимал) кўрсаткичлар билан (сув сарфи, кимёвий таркиби, ҳарорати ва ш.к.) фойдаланишни таъминловчи муҳандислик-техникавий тадбирлар мажмуи. Жан. Шарқий Осиёда, Ўрта Осиё ва Закавказеда тарқалган қадимий К. иншоотларидан бири кориздир. Ер ости сувларнинг замонавий К. иншоотлари (асосан, бурғи қудуғи) ўзининг конструксияси ва типларига кўра турли хил бўлиб, улар гидрогеологик шароит хусусиятларини, сув таркибини, техника ва санитария талабларини, фойдаланиш режими ва мақсадлари ва б.ни ҳисобга олган ҳолда қурилади. Юзароқ жойлашган сувли қатламлардан ер ости сувларини олишда К. нинг энг содда тури — шахтасимон қудуқлардан фойдаланилади. Фаввора бўлиб чиқадиган ер ости сувлари ва намакоблардан фойдаланиш иқтисодий жиҳатдан самарали ҳисобланади.