Kasals Pablo

КАСАЛС (Cасалс) Пабло (1876.29.12, Барселона яқинидаги Вендрел қишлоғи — 1973.22.10, ПуэртоРико, Сан-Хуан ш.) — испан созандаси (виолончел), дирижёр, композитор, мусиқа-жамоат арбоби; ХХ аср жаҳон мусиқаси намояндаларидан. Барселона ва Мадрид консерваторияларида таълим олган. Консерт фаолиятини 1890-й.ларда Барселонада бошлаган. 1899-йилдан Европа ва Америка мамлакатларида, 1901-йилдан жаҳон бўйлаб гастролда бўлган. К. замонавий виолончел ижрочилигида янги давр очди, унинг ижроси сермазмунлиги, ўта ифодавийлиги, юксак техник ва бадиий маҳорати, турли мусиқа услубларини чуқур ҳис этиши билан ажралиб туради. Барселонада илк симфоник оркестр (1920) ва Ишчилар мусиқа жамиятини (1924), Сан-Хуанда симфоник оркестр (1959) ва консерваторияни (1960), Прад (Франсия, 1950) ва Сан-Хуанда (1957) мусиқа фестивалларини ташкил қилган. Бир неча симфоник, хор, камер-чолғу асарлар муаллифи. БМТ учун "Тинчлик мадҳияси"ни яратган (1971). 1957-йилдан К. номидаги халқаро танловлар (Париж ва Будапештда) ўтказилади.