Kebin zilzilasi

Кебин зилзиласи - 1911 й. 4 январ да Қозоғистоннинг Верний (ҳоз. Олма-ота) ш. ёнида юз берган. Дунёдаги энг кучли зилзилалардан бири ҳисобланади. Зилзила кучи эпицентрида 10—11 балл, магнитудаси 8,2, чуқ. 2,5 км бўлган. Қозоғистоннинг Верний, Уйтол, Жилариқ каби бир қанча шаҳар ва қишлоқларида зилзила кучи 9 баллга етган. К.з. кучи ва тебранишининг теваракатрофга тарқалиши жиҳатидан ҳам жуда кучли эканлиги тан олинган.

Ер силкиниши вақтида ҳосил бўлган тўлқин бутун Ер куррасини 3 марта айланиб чиққан. Эпицентр зонасида ҳосил бўлган ер ёриқларининг уз. 40— 50 км га етган. Айниқса, Сазоновка— Оқсу қишлоқлари оралиғидаги ёриқлар бўйлаб тоғ жинслари кескин силжиган, катта-кичик ўпирилма ва сурилмалар содир бўлган.

Зилзила оқибатида ҳалок бўлганлар сони 450 дан ортган. Верний ш.нинг ўзида пишиқ ғиштдан қурилган 776 иморат бутунлай бузилиб кетган. К.з. таъсири Россиянинг зилзила ўчоғидан 1000 км узоқликдаги Омск, Томск ҳамда Қозоғистоннинг Кўкчатов ш.ларида ҳам сезилган. Ер силкинишлари 6 ойгача такрорланиб турган. Шу давр ичида 300 дан ортиқ тебранишлар қайд этилган. Зилзила марказида кучли қайта силкинишлар ўша йилнинг 9,12,14 январ кунлари содир бўлган.