Kito

Кито — Эквадорнинг пойтахти. Пичинча вулканининг жанубий ён бағрида, 2818 м баландликда жойлашган. Пичинча провинсиясининг маъмурий маркази. Иқлими экваториал, баланд тоғ иқлими. Ўртача ойлик температура 25°. Йиллик ёғин 1100–1200 мм. Аҳолиси 1,4 млн. киши (1995).

К.га индейсларнинг қад. шаҳри ўрнида 1534-йилда испан конкистадори С.Белалкасар асос солган ва ўша даврдан мустамлака маркази бўлган. 1822-йилдан Буюк Колумбия таркибида. 1830-йилдан Эквадор Республикаси пойтахти. К. 1797, 1859-йиллардаги зилзиладан катта зарар кўрган.

К. — мамлакатнинг сиёсий ва иқтисодий маркази. Транспорт йўли ва шоссе йўллар орқали Анд водийсидаги энг йирик шаҳарлар ва Тинч океан соҳили билан боғланган. Панамерика шоссеси К.ни Богота (Колумбия) ва Лима (Перу) шаҳарлари билан боғлайди. Аэропорти халқаро аҳамиятга эга. К.да тўқимачилик саноати ривожланган. Озиқ-овқат, кўн поябзал, мебел, керамика, кимё-фармацевтика, машинасозлик саноати корхоналари бор. Ҳунармандчиликда заргарлик ва бошқа буюмлар тайёрланади. Меъморий ёдгорликлардан Ҳукумат саройи (1747), собор, Ла-Компания черкови, майдонлар ва бошқа сақланган. Марказий ва Католик университетлари, Политехника мактаби, коллеж, педагогика институти, Эквадор Фанлар академияси, тиббиёт, мусиқа, ҳарбий академиялар, илмий жамиятлар, Миллий театр, музейлар, йирик кутубхо-налар, расадхона, ботаниқа боғи ва бошқа бор.