Kommutator

Коммутатор (лотинча cоммуто — алмаштираман, ўзгартираман), алмашлаб улагич, тақсимлагич — электр занжирини улаш, ўзиш, алмашлаб улаш ва занжирдан ўтаётган ток йўналишини ўзгартириш учун ишлатиладиган қурилма. Алмашлаб улаш қўлда (мас, телеграф К.и) ёки махсус дастур асосида автоматик тарзда бажарилади. Электромеханик, электрон ва электрон нурли К.лар бор. Оддий электромеханик К.: рубилниклар, электр машина коллекторлари; электромагнит реле тўпламлари ва бошқа Электрон К. — маълум функсионал схемалар бўйича ион асбоблари, электрон лампалар, яримўтказгичлардан йиғилган электрон қурилмалар. Электрон нурли К. — электрон нур ёрдамида бошқа асбобнинг уланиш схемасини ўзгартиради. К. электротехника, алоқа, телемеханиканинг кўп воситалари ва бошқаларда қўлланади.