Maseru

Масеру — Лесото пойтахти (1966). Денгиз сатҳидан 1500 м баландликда, мамлакатнинг ғарбий чегараси яқинида, Каледон дарёси (Оранж ирмоғи)нинг чап соҳилида жойлашган. Аҳолиси 63 минг кишидан зиёд (1990-йиллар ўрталари). Савдо-транспорт маркази. Автомобил йўллари тугуни. Аэропорти халқаро аҳамиятга эга. Қайта ишловчи саноат корхоналари, ремонт устахоналари, мебел, тикувчилик, курилиш материаллари ишлаб чиқариш корхоналари ва бошқа мавжуд. Аҳолисининг кўпчилиги қишлоқ хўжалигида, бир қисми ЖАРнинг олтин конларида ишлайди. Қишлоқ хўжалиги коллежи, шаҳар яқинида миллий университет, кутубхона, телемарказ бор. Шаҳарга 1869-йилда асос солинган, 1966-йилгача мустамлака маркази, кейинроқ мустақил давлат пойтахти бўлган.