Payza

Пайза, пайдза (хитойча-мўғулча) — ёрлиқ. Чингизхон Ясясига биноан жорий этилган, олтин, кумуш, чўян, жез ҳамда ёғоч тахтачаларга битилган, мўғул хонлари томонидан мўғуллар ҳукмронлигига тобе мамлакатларга тайинланган ноиблар, шунингдек, чопар ва элчиларга, уларнинг лавозимларига қараб бериладиган ёрлиқ, буйруқ. Ноибларга ҳамда элчиларга бериладиган олтин П.га хоннинг буйруклари ёзилган ва улар ноиб ёки элчига чексиз ваколат ҳуқуқини берган. П. эгаси истаган нарсани талаб қилишга ҳақли бўлган, унинг талаби сўзсиз бажарилган. Мақаллий ҳукумат вакиллари П. бор маъмурга от, йўл кўрсатувчи киши, озиқ-овқат ва бошқа хизматларни кўрсатишга масъул бўлганлар. П.нинг даражасига қараб унга қуш ёки ҳайвон расми солинган. Энг олий даражали П. юзига йўлбарс сурати туширилган. Бу турдаги П. ҳукмронлик ва дахлсизлик белгиси бўлиб хизмат қилган. П.га эга шахслар таланиш ёки жазоланишдан мустасно эдилар.