Pnevmoskleroz
Пневмосклероз – ўпкада бириктирувчи тўқималарнинг кўпайиши, уларнинг фаолиятининг бузилиши. Кўпинча ўпкада яллиғланиш ёки дистрофик жараёнларнинг натижаси бўлиб, зарарланган қисмларда эластиклик ва газ алмашинувининг бузилиши билан бирга кечади. Ушбу патология бронхларнинг деформациясига, ўпка тўқималарининг сиқилишига ва буришишига олиб келади, бунинг натижасида ўпка ҳажми камаяди. Ушбу патология ҳар қандай ёшда ривожланиши мумкин[1].
Этиологияси ва патогенези
Пневмосклерозга ўпканинг яллиғланиш ва деструктив (зотилжам, абсесс), алоҳида табиатдаги (сил) ва ўпка зарарланиши билан кечувчи касб касалликлари (пневмокониозлар), алвеолит, ўпка тўқимасининг жароҳатлар оқибатида зарарланиши, нурланиш ва бошқалар сабаб бўлади[2].
Клиник манзараси
Пневмосклерозга хос бўлган специфик клиник белгилар йўқ. Клиник манзарасида пневмосклероз ривожланишига сабаб бўлган касалликларнинг (сурункали зотилжам,бронхоэктаз ва бошқалар) белгилари юзага чиқиши мумкин. Шу билан бирга пневмосклерозда, айниқса унинг диффуз шаклларида, кўпинча ўпканинг вентиляция фаолияти бузилади ва бу клиник жиҳатдан ҳансираш ва сианоз билан намоён бўлади. Кечки босқичларида фиброз соҳаларга мос тушувчи кенг ўчоқлар пайдо бўлади[2].
Кечиши
Пневмосклерозга секин-аста зўрайиб борувчи гипоксемия, ўпка гипертензияси, яққол намоён бўлган нафас ва юрак етишмовчилиги ривожланиши хос[2].
Даволаш
Пневмосклерозни даволашнинг ўзига хос услублари мавжуд эмас. Унинг ривожланишига сабаб бўлган касалликлар (сурункали зотилжам, бронхоэктаз касаллиги ва бошқалар) даволанади. Нафас ва юрак етишмовчилиги қўшилганда симптоматик даво чоралари қўлланади (оксигенотерапия, юрак гликозидлари, сийдик ҳайдовчи дорилар). Пневмосклерознинг профилактикаси нафас аъзоларининг ўткир ва сурункали касалликларини олдини олиш ва даволашдан иборат[2].
Манбалар
- ↑ „Пневмосклероз“. Қаралди: 2024-йил 6-октябр.
- ↑ 2,0 2,1 2,2 2,3 Ички касалликлар пропедифтикаси — 188-бет. Қаралди: 2024-йил 6-октябр.