Qurultoy (mahalla)

Qurultoy — Qashqadaryo viloyati, Chiroqchi tumanida joylashgan qishloq. 20-asrning 30-yillarida bu yerda jamoa xo‘jaligi (kolxoz) tashkil etilgan va unga “Qurultoy” nomi berilgan. Keyinchalik xo‘jaliklar yiriklashtirilib, boshqa nomlar bilan atalgan bo‘lsa-da, ushbu nom qishloq nomiga aylangan. Nomning kelib chiqishi turkiy va mo‘g‘ul tillaridagi oltoy bobo tili merosiga borib taqaladi. Ilk davrlarda harbiy kengash, yig‘ilish va maslahatlarning umumiy nomi qurultoy deb atalgan. Hun xoqonligi davridan boshlab, Turk xoqonligi (6–8-asrlar) oldidan qurultoylar o‘tkazilgan. Mo‘g‘ullar hukmronligi davrida qurultoy mamlakat boshqaruv tizimining eng oliy darajasiga erishgan. Amir Temur va temuriylar davrida qurultoylar mamlakatning ijtimoiy, siyosiy, iqtisodiy va harbiy masalalarini hal qilish, shuningdek hukmdor va harbiy qo‘mondonlarni saylash uchun o‘tkazilgan. Xonliklar davrida ham qurultoylar faoliyat yuritgan, Sho‘ro hukumati davrida ham ular davom ettirilgan. Tarixda qurultoy xalq faollarining katta yig‘ini bo‘lgan va uning maqsadi davrlar o‘tishi bilan o‘zgarib turgan.