Rahmat Nazriy
Rahmat Nazriy (tojikcha: Rahmat Nazrӣ; 15-oktyabr 1951-yil, Koʻlob, Tojikiston SSR) — tojik shoiri va jurnalisti, Tojikiston xalq shoiri (2003), Tojikiston Yozuvchilar uyushmasi aʼzosi (1979-yildan), Abu Abdulloh Rūdakiy nomidagi Tojikiston Davlat mukofoti laureati (2000)[1].
| Rahmat Nazriy | |
|---|---|
| Tavalludi |
15.10.1951 |
| Kasbi | shoir, jurnalist |
| Fuqaroligi | Tojikiston |
| Faoliyat yillari | 1968—hozirgacha |
| Janr | sheʼr, gʻazal, toʻrtlik |
| Mukofotlari |
Tojikiston xalq shoiri (2003) Abu Abdulloh Rūdakiy nomidagi Tojikiston Davlat mukofoti (2000) Mirzo Tursunzoda nomidagi adabiy mukofot (1993) Tojikiston Komsomoli mukofoti (1988) |
Tarjimai holi
Rahmat Nazriy 1951-yil 15-oktyabrda Xatlon viloyatining Koʻlob shahrida tavallud topgan. 1968-yilda Koʻlob shahridagi 7-sonli oʻrta maktabni, 1973-yilda V. I. Lenin nomidagi Tojikiston davlat universitetining (Tojikiston milliy universiteti) jurnalistika fakultetini tamomlagan.
Ilk ish faoliyatini «Maorif va madaniyat» roʻznomasida muxbirlikdan boshlagan (1973—1979). Keyingi yillarda Tojikiston Yozuvchilar ittifoqining adabiyot targʻiboti markazida ish yurituvchi (1979—1983), «Adabiyot va sanʼat» haftanomasida boʻlim mudiri va bosh muharrir oʻrinbosari (1983—1989), Yozuvchilar ittifoqida nazm boʻyicha maslahatchi (1989—2002) boʻlib ishlagan.
2002-yildan Tojikiston Hukumat huzuridagi Adabiyot, sanʼat va meʼmorchilik sohasidagi Abu Abdulloh Rūdakiy nomidagi Davlat mukofoti qoʻmitasining masʼul kotibi vazifasida ishlaydi.
Ijodi
1977-yilda shoirning «Yashil barg» (tojikcha: Bargi sabz) nomli ilk sheʼriy toʻplami ustod Boqiy Rahimzodaning soʻzboshisi bilan chop etilgan. Keyinchalik «Kun sitorasi» (Sitorai rӯz, 1982), «Olov lolasi» (Lolai otash, 1984), «Qismat» (Sarnavisht, 1988), «Mehrob» (1991), «Haftrang» (2002), «Sukunat sadosi» (Sadoi xomӯshӣ, 2006), «Sitoraboron» (2011), «Chilchiroq» (Chilcharogʻ, 2011), «Shirmahtob» (2012), «Shirinkoma» (2012), «Silsila» (Shilshila, 2013), «Yuzma-yuz» (Dida ba dida, 2014) kabi kitoblari nashr etilgan.
Sheʼrlari olmon, latish, rus, ingliz, oʻzbek, arab, turk, ukrain, bulgʻor, arman, avar, qozoq va qirgʻiz tillariga tarjima qilingan.
Rahmat Nazriy sheʼrlariga bastalangan qoʻshiqlar bilan ham mashhur. 1985, 1986 va 1990-yillarda Toshkent shahrida «Melodiya» firmasi tomonidan «Rahmat Nazriy sheʼrlaridan tuzilgan qoʻshiqlar» nomli 3 ta gramplastinka chiqarilgan.
Mukofotlari
- Tojikiston Komsomoli mukofoti (1988) — «Qismat» (Sarnavisht) kitobi uchun;
- Mirzo Tursunzoda nomidagi adabiy mukofot (1993) — «Mehrob» kitobi uchun;
- Abu Abdulloh Rūdakiy nomidagi Tojikiston Davlat mukofoti (2000) — «Oy xirmoni» (Xirmani moh) toʻrtliklar majmuasi uchun;
- Tojikiston xalq shoiri (2003).
Manbalar
- ↑ Adiboni Tojikiston (maʼlumotnomai muxtasari sharhiholiy) / Tahiya va tanzimi Asrori Somoniy va Majid Salim. — Dushanbe: «Adib», 2014. — S. 153. — ISBN 978-99947-2-379-9.