Samar Nurov

Samar Nurov
Tavalludi	17-iyul 1934-yil Qarshi tumani, Qashqadaryo viloyati
Vafoti	8-iyun 2003-yil(2003-06-08) (68 yoshda) Qarshi tumani, Qashqadaryo viloyati
Taxallusi	Samar Nur, Samar Nuriy
Kasbi	Jurnalist, yozuvchi
Ijod qilgan tillari	Oʻzbek tili va rus tilida
Fuqaroligi	Oʻzbekiston
Taʼlimi	Oʻrta Osiyo davlat universiteti
Yoʻnalish	Publisistika, roman
Faoliyat yillari	1956—2003
Janr	Qissa, hikoya, roman
Mukofotlari

Samariddin Nurmuhammad oʻgʻli Nurov (1934-yil 17-iyul, Qashqadaryo viloyati Qarshi tumani — 2003-yil 8-iyun) — oʻzbekistonlik jurnalist va yozuvchi. Oʻzbekiston yozuvchilar uyushmasi aʼzosi, Oʻzbekistonda xizmat koʻrsatgan madaniyat xodimi (1999).

Biografiyasi

1934-yil 17-iyulda Qashqadaryo viloyati Qarshi tumani Jangallik qishlogʻida tugʻilgan. 1945—1952-yillarda Qarshidagi 2-maktabda kashshoflar yetakchisi, viloyat madaniy-oqartuv boshqarmasida hisobchi, Chimqoʻrgʻon suv ombori qurilishida ekskavator mashinistiga yordamchi boʻlib ishlagan. 1956-yilda Oʻrta Osiyo davlat universitetining jurnalistika boʻlimini tugatgan. „Qashqadaryo haqiqati“ viloyat gazetasida qishloq xoʻjaligi boʻlimi mudiri, masʼul kotib, Respublika radioeshittirish qoʻmitasining Qashqadaryo viloyatidagi muxbiri, Respublika Markaziy Qoʻmitasining „Sovet Oʻzbekistoni“ gazetasida adabiy-badiiy masʼul kotib, sayyor muxbir, Oʻzbekiston Kommunistik partiyasining „Guliston“ oynomasida masʼul kotib boʻlib ishlagan. 1973-yilda birinchi guruh nogironi boʻlib qolgan. Qarshiga qaytib, Qashqadaryo yozuvchilar boʻlimini tuzgan va boshqargan. 1999-yilda „Oʻzbekiston Respublikasida xizmat koʻrsatgan madaniyat xodimi“ faxriy unvoni bilan taqdirlangan. Adib 2003-yil 8-iyunda vafot etgan. Qarshi shahridagi „Eshon Shohid“ qabristoniga dafn etilgan.

Ijodi

Asarlari Oʻzbekiston va qardosh respublikalarda, Moskvadagi „Sovetskiy pisatelь“, „Drujba narodov“ nashriyoti va jurnallarida chop etilgan. „Olis yulduzlar“ va „Soyaki xurmo“ qissalari, besh hikoyasi teleekranlashtirilgan. Orol dengizi fojiasi haqidagi „Suv qoʻshigʻi“, „Qur-ey, qur-ey“ „Qushlar qaytib keldilar“ hujjatli qissalar muallifi. Gʻafur Gʻulom nomidagi nashriyotda, „Yosh gvardiya“, „Yozuvchi“, „Sovetskiy pisatelь“ nashriyotlarida chop etilgan. „Choʻl uygʻon“, „Durdona“, „Bir uy quvonch“, „Beda hidi“, „Bodom guli“, „Yaylovdagi gulxanlar“, „Saharxez qushlar“, „Mindalь zatsvetyot“ nomli hikoyalar toʻplamlari, „Seni sevaman hayot“, „Chaqmoq“, „Olis yulduzlar“, „Davomli maktublar“ qissalari, „Narvon“, „Maysalarni ayoz urmaydi“, „Qora tong“ nomli romanlari, jami yigirma ikki kitobi nashr etilgan. Kitoblari nusxasi (tiraji) ikki milliondan oshgan. Ayrim asarlari rus, ukrain, ozarbayjon, tojik, turkman, qozoq, eston, bulgʻor, turk va boshqa tillarga tarjima qilingan. „Qora tong“ turkumidagi tarixiy badiiy asarlari ustida ishlagan. Shu turkumdagi uchinchi kitob — „Qora tong“ („Qarshi xoni“) adib oʻlimidan soʻng nashr etildi.