Selsin

Селсин [инг. селф — ўзим ва юн. сйнчронс — бир вақтда, синхрон] — бирбирига механик тарзда бириккан қурилма валининг бурилиш бурчагини маълум масофадаги иккинчи валга синхрон узатадиган индуксион электр машина. Етакчи валнинг бурилиш бурчаги датчиги сигналларини узатадиган С.датчик, етакланувчи вални худди шу бурчакка бурадиган С.қабул қилгичдан иборат. Ҳар бир С.нинг бирламчи чулғамида ҳосил бўладиган бир фазали ўзгарувчан оқим иккиламчи чулғамда фазалари мос келадиган, аммо қиймати бўйича фарқ қиладиган уч хил э.ю.к. ни индуксиялайди. Датчик ва қабул қилгич роторлари синфаз (бир хил) ҳолатда бўлганда иккала С. нинг иккиламчи чулғамдаги э.ю.к. ўзаро мувозанатлашади, натижада иккинчи занжирда ток бўлмайди. Датчик ротори қабул қилгич роторига нисбатан бурилганда иккиламчи чулғамлардаги э.ю.к. ўзгаради, натижада роторни бир хил ҳолатга келтиришга интиладиган, мослаштирувчи ток ҳосил бўлади. С. технологик жараёнларни назорат қилиш ва бошқариш, ўлчаш асбоблари кўрсатган маълумотларни масофага узатиш учун ишлатилади.