Spondilit

Спондилит — умуртқа поғонасининг сурункали яллиғланиши. Кўпинча сил касаллиги сабаб бўлади. Захм, актиномикоз, стафилококк инфексияси (умуртқа поғонасининг ўткир ва сурункали остеомиелитм), ревматизмга алоқадор артрит ва бошқа касалликларда С. камроқ учрайди.

Сил С.ида умуртқа поғонасининг кўкрак бўлимида, захм С.ида бўйин бўлимида, ревматизмга алоқадор С.да бел ва кўкрак бўлимларида ўзгариш рўй беради. Сил Си аксари 10 ёшгача бўлган болаларда, захм С.и 40—50 ёшларда, ревматизмга алоқадор С. 20— 30 ёшларда бошланади. Касаллик, одатда, астасекин, беморга билинмасдан ривожланади.

С.да умуртқалар танаси емирилиб, умуртқа поғонасининг шакли ўзгаради. Умуртқа поғонасининг бурчак ҳосил қилиб қийшайиши — букрилик С.нинг энг тавсифловчи белгисидир. Умуртқалар танаси бир текис емирилганда ён томонга қийшайиш (сколиоз) рўй бериб, кўпроқ умуртқа поғонасининг бел бўлимида кузатилади (қаранг: Умуртқа поғонасининг қийшайиши).

С.да умуртқа поғонаси ва уни ўраб турган мускуллардаги тинимсиз кучли оғриқ умумий сил интоксикацияси белгилари: ланжлик, ҳолсизлик, гавда температурасининг кўтарилиши ва ориқлаб кетиш билан бирга кечади. Касаллик оғирлашганда умуртқа поғонасининг шакли ўзгаради (букрилик), кўпинча уни ўраб турган тўқималарда оқма яралар пайдо бўлиб, орқа миянинг зарарланиши кузатилади. Жараён сўнгандан кейин оғриқ йўқолади, беморнинг умумий аҳволи яхшиланади. Бироқ буни соғайиш деб бўлмайди. Одатда, инфексиянинг "яширин" ўчоқлари бўлиб, улар касалликнинг қайталанишига олиб келиши мумкин.

С.га клиниклаб. ва рентгенологик текширувлар асосида диагноз қўйилади. Бемор антибактериал препаратлар, ортопедик методлар (гипс каравот, корсет ва умуртқа поғонасини фиксация қилишнинг бошқа методлари) билан, шунингдек, санаторийкурортда даволанади. Баъзан операция қилишга тўғри келади.