Sukarno

СУКАРНО (Сукарно) Аҳмад (1901.6.6, Сурабая — 1970.21.6, Жакарта) — Индонезия жамоат ва давлат арбоби. Бандунг технология институтини тугатган (1925). Индонезия миллий партиясини тузишда фаол қатнашган ва унинг 1-раиси (1927). 1929 и. декабрда Голландия мустамлака ҳукумати томонидан ҳибсга олинган ва партия тарқатиб юборилган. Озодликка чиққандан сўнг, 1931-йил ташкил этилган Индонезия партиясига кирган ва унинг раиси этиб сайланган. 1933-йил яна қамоққа олиниб, Флорес о.га сургун қилинган ва кейинчалик, Жанубий Суматрага кўчирилган (1938—42). Индонезия Япония томонидан босиб олинган вақтда (1942— 45) С. япон ҳукмдорлари билан расман холисона муносабатда бўлсада, мамлакат озодлиги манфаатлари учун курашни ҳамда махфий миллий ватанпарвар ташкилотлар билан алоқаларни давом эттирган. С. гитлерчилар Германиясини ва милитаристик Япониянинг сиёсатини қоралаган. 1945-йил 17 августда у мамлакатда Голландия мустамлака тузуми тугатилганлиги ва мустақил Индонезия Республикаси тузилганлигини эълон қилган. С. Индонезия Республикасининг 1-президенти бўлган. У Осиё ва Африка мамлакатларининг 1955-йилдаги Бандунг конференсияси ташаббускори. 1965-йил 30 сентабрда ҳарбий гуруҳ ҳокимият тепасига келиши натижасида Индонезия сиёсий ҳаётида С.нинг мавқеи пасайган. 1966-йил мартда ҳокимиятни Суҳартога топширган.