Xixvi

Хихви (/ кʰɪˈхви /; грузинча ხიხვი) — Шарқий Грузияда, хусусан Кахети минтақасида етиштириладиган узум нави.

Келиб чиқиши

Узумнинг келиб чиқиши ва унинг номининг айни қаердан пайдо бўлганлиги ноаниқлигича қолмоқда. Хихви узумлари асосан вилоятнинг шарқий-жанубий минтақаларида, Алазани дарёсининг ўнг қирғоғи яқинида ўстирилади. Шунингдек, Картлида ҳам мазкур узум нави етиштирилади.

Узумчилик

Узумлар юмалоқ кўринишда бўлган катта, уч бўлакли барглари билан ажралиб туради. Ўртача катталикдаги шодаси конуссимон, қаноцимон, кўринишга эга бўлади. Узум доналарининг ўзи эса ўртача узунликда, яшил-сариқ тусли, пўсти юпқа бўлади. Хихви узумининг куртаклари одатда апрел ойининг биринчи ярмида униб чиқа бошлайди ва сентябр ойида етилади.

Вино тайёрлаш услуби

Хихви Европа ва анъанавий грузин Квеври методологиясида стол ва ширин шароб ишлаб чиқариш учун етиштирилади. Узум ўзининг юқори шакар консентрацияси билан машҳур. Ундан ёрқин яшил ва қуюқ рангга эга бўлган яхши мувозанатлашган, нозик таъмли шароб ишлаб чиқарилади.

Хихви ўзининг юқори сифати сабабли ҳам мақтовга сазовор бўлиб, бошқа вино тайёрланадиган узум навлари билан уларнинг юмшоқлиги ва хушбўйлигини яхшилаш учун қўшимча сифатида биргаликда фойдаланилиши мумкин. Бундан ташқари, у ўзининг қуюқ сариқ ранги, гармоник таъми билан машҳур Карданахи микро зонасида яхши сифатли ширин шароб ишлаб чиқариш учун фойдаланилади.

Хихви виноси ўртача алкогол даражаси ва юмшоқ кислоталилиги билан ажралиб туради. Бу уни битта навли шароб сифатида мустақил ишлаб чиқариш учун ёки аралашманинг юқори консентрациясини ошириш учун қўшимча сифатида қўлланилишига мос келади. Потенциалига қарамай, Хихви узумлари ва ундан тайёрланган шароб ҳали ҳам у қадар кўп ўрганилмаган ва бошқа шароб турлари сингари қадрланмайди.