Yevkradit

Евкрадит (? — мил. ав. 155) — Юнон-Бақтрия подшолиги шоҳи (мил. ав. тахминан 171 — 155), дастлаб Бақтриядаги ҳарбий гарнизон бошлиғи. Деметрий И нинг Ҳиндистонга қилган юришидан фойдаланиб, мил. ав. тахминан 174-йилда Бактрияда қўзғолон кўтарган ва ҳокимиятни ўз қўлига олган. Бақтрияликлар Евкрадит бошчилигида суғдийлар, арахотлар, дранғлар, арейлар ва ҳиндлар билан бетиним урушлар олиб боришган. Деметрий И бир қисм қўшини билан Ҳиндистон юришидан қайтиб Евкрадит қўшини билан курашга киришган ва Бақтра шаҳарини қамал қилган. Қамал 5 ойга чўзилган. Евкрадит 300 жангчиси билан бот-бот қалъадан чиқиб 60 минглик қўшинга эга рақибига кетма-кет зарбалар бериб ғалабага эришган, Деметрий И жангда ҳалок бўлган. Деметрий И нинг ворислари Ҳинд водийсидаги ҳокимиятни ўз қўлларида сақлаб қолган. 2 та мустақил ҳокимият: Юнон-Бақтрия ва Юнон-Ҳинд подшолиги вужудга келган. Мил. ав. 162-йилда Евкрадит Парапамисадга бостириб кириб Деметрий И нинг ворисларидан Панжобни тортиб олган. Аммо, унинг ҳужуми Ҳинд воҳасидаги Юнон-Ҳинд подшолигининг шоҳи Менандр томонидан тўхтатилган. Евкрадит Ҳиндистондан қайтаётганида ўғли ва тахтдоши Гелиокл томонидан ўлдирилган. Евкрадит зарб этган тангалар археологлар томонидан Ўзбекистон, Туркманистон, Тожикистон ва Афғонистон ҳудудидан кўплаб топилган.

Яна қаранг

• Юнон-Бақтрия подшолиги