Anvar Ilhomov

Ziyosferada ismi Anvar va familiyasi Ilhomov boʻlgan boshqa kishilar haqida ham maqolalar mavjud.

Anvar Ilhomov (20.8.1946 Toshkent) — naqqosh, Oʻzbekistonda xizmat kursatgan sanʼat arbobi (1983). P. Benkov nomidagi Respublika rassomlik bilim yurtida taʼlim olgan (1963— 68-yillar), ToshPIning meʼmorlik fakultetini tugatgan (1973). Toshkentdagi kulollik tajriba zavodi (1967—77), „Us to“ birlashmasi (1977—80) da naqqosh, ijodiy guruh rahbari (1980-yildan). Ilhomov zamonaviy binolarni anʼanaviy naqshlar bilan bezashda kulollik buyumlari, naqqoshlik, yogʻoch oʻymakorligi sanʼatining uygʻunligiga erishdi. Naq-qoshlikda unutilgan kundal usulini rivojlantirishga katta hissa qoʻshdi. Naqshlar mujassamotida esa ranglarning bir-biriga mayin bogʻlanishini taʼminladi. Toshkentdagi Xalqlar Doʻstligi saroyining banket zali (1980), „Dilorom“ (1980), „Yulduz“, „Sirdaryo“ qahvaxonalarini, Toʻqimachilar madaniyat saroyi (1987), Guliston shahridagi Sirdaryo teatri (1985), Germaniyaning Ganover shahridagi „Turkiston“ restorani (1992), Toshkentdagi „Turkiston“ saroyi (1995), Temuriylar tarixi davlat muzeyi (1997), Imom Buxoriy majmuasi (1998), Quva shahridagi Ahmad Fargʻoniy majmuasi (1998) va boshqa binolarni bezadi.

Anvar Ilhomov

Kamoliddin Behzod nomidagi Oʻzbekiston Davlat mukofoti laureati (1997).