Chimqoʻrgʻon suv ombori

Чимқўрғон сув омбори — Қашқадарёнинг ўрта оқимида қурилган гидротехника иншооти. Қашқадарё вилояти ҳудудида, Қарши шаҳридан 60 км шарқда. Чимқўрғон сув омбори қурилиши 1958-йилда бошланган. 1960-йилдан доимий фойдаланишга топширилди. Тўла сиғими 500 млн. м³, фойдали сиғими 450 млн. м³. Суви юзаси сатҳи 49,2 км², сув омбори ўзан типида. Узунлиги 17,5 км, максимал чуқурлиги 30 метр, ўртача чуқурлиги 17,2 метр. Қашқадарё оқимини мавсумий тартибга солиш учун мўлжалланган. Қашқадарё вилоятининг Қамаши, Қарши, Ғузор ва Косон туманларидаги 188 минг га (гектар) ерни суғоради. Чимқўрғон сув омбори таркибига тупроқли тўғон, минорали сув чиқаргич, қуйи бефда жойлашган чап соҳил (27 м³/с) ва ўнг соҳил (22 м³/с) бош тақсимлагичлари киради. Тўғон баландлиги 33 метр. Минорали сув чиқаргич суғориш учун сув бериш ва айни вақтда ортиқча сувни чиқариб ташлаш учун мўлжалланган (сув ўтказиш имконияти 350 м³/с).

Чегаралари

• Шимолий чегараси — Қоратепа, Дурмон қишлоқлари.
• Ғарбий чегараси — Бирдоли, Туқбой, Ғиштли қишлоқлари.
• Шарқий чегараси — Чимқўрғон, Пахтаобод қишлоқлари.
• Жанубий чегараси — Баландчайла, Кулёмғир қишлоқлари.