Illusions (Bach romani)
Illusions: The Adventures of a Reluctant Messiah — yozuvchi va uchuvchi Richard Bach qalamiga mansub roman. Ilk bor 1977-yilda nashr etilgan. Asar kitobxonning voqelikka boʻlgan qarashlarini soʻroq ostiga oladi. Shuningdek, biz voqelik deb ataydigan narsa aslida oʻrganish hamda zavq olish uchun oʻzimiz yaratadigan sarobdan iborat ekanini ilgari suradi. Illusions muallifning 1970-yilda chop etilgan Jonathan Livingston Seagull asaridan keyingi kitobi edi.
| Asl nomi | Illusions: The Adventures of a Reluctant Messiah |
|---|---|
| Muallif(lar) | Richard Bach |
| Mamlakat | AQSh |
| Til | Inglizcha |
| Janr(lar)i | Falsafiy roman, maʼnaviyat |
| Nashr etilgan sanasi | 1977 |
| Nashriyot | Dell Publishing Co., Inc. |
| Sahifalar soni | 143 |
| ISBN | 0-440-04318-2 |
| OCLC | 2870699 |
Syujeti
Illusions romani AQShning Oʻrta Gʻarbiy qismidagi dala maydonida uchrashib qolgan ikkita akrobat-uchuvchi sarguzashtlari atrofida kechadi. Asarning ikki asosiy qahramoni oʻrtasida ustoz-shogird munosabatlari yuzaga keladi. Bu munosabatlar biz yashab turgan dunyo sarob degan konsepsiyani hamda uning ostida yotgan tub reallikni tushuntirib beradi:
„Bordi-yu, menga oʻz dunyoyim qanday tuzilganini va uni qanday boshqarishni oʻrgata oladigan biror inson paydo boʻlib qolsa-chi?.. Bordi-yu, zamonamizda dunyoviy saroblar ortidagi haqiqatni anglab yetgani bois ularning ustidan hukmronlik qilish qudratiga ega boʻlgan biror Siddhartha yashasa-chi? Mabodo, men u bilan yuzma-yuz uchrashib qolsam-chi? Aytaylik, u ham kukuruznikda uchib yurib, men qoʻngan oʻtloqqa qoʻnsa-ya?“
Donald William Shimoda odamlar moʻjizalarning mohiyatini anglashdan koʻra, ularni koʻproq tomosha va koʻngilochar shou sifatida qabul qilishini tushunib yetgach, oʻz vazifasidan voz kechgan xaloskor. U oʻzi kabi akrobat-uchuvchi boʻlib ishlaydigan Richard bilan tanishib qoladi. Ularning ikkalasi ham sayohatlari davomida yoʻllarida uchragan fermerlarning dalalariga qoʻnib, yoʻlovchilarni bir necha dollar evaziga eski biplanlarda qisqa muddatga uchirish bilan shugʻullanishadi. Vaqtinchalik uchish maydonchasiga bobo va nabira kelganida, Donald ilk bor Richardning eʼtiborini tortadi. Odatda keksalar ehtiyotkor, yoshlar esa parvoz qilishga ishtiyoqmand boʻladilar. Biroq, bu safar bobo uchishni xohlar, nabirasi esa bundan qoʻrqardi. Donald qizaloqqa uning bu qoʻrquvi oʻtgan hayotidagi ogʻir ruhiy jarohat bilan bogʻliqligini tushuntiradi. Bu gaplardan soʻng qiz tinchlanib, uchishga rozi boʻladi. Bu holatning guvohi boʻlgan Richardda katta qiziqish uygʻonadi. Shundan soʻng, Donald unga oʻz bilimlarini bera boshlaydi va hatto Richardning oʻziga ham „moʻjizalar“ yaratishni oʻrgatadi.
Romanda Shimodaga tegishli boʻlgan va keyinchalik Richard oʻziniki qilib olgan „Masihning qoʻllanmasi“dan iqtiboslar keltirilgan. Ushbu qoʻllanmaning gʻayrioddiy jihati shundaki, uning sahifalari raqamlanmagan. Shimoda Richardga buning sababi kitob oʻquvchi uchun yoʻl-yoʻriq boʻladigan yoki uning xayolidagi shubha va savollarga javob topiladigan sahifada ochilishi ekanini aytadi. Bu sehrli kitob emas. Shimodaning tushuntirishicha, buni har qanday matn bilan ham amalga oshirish mumkin. „Masihning qoʻllanmasi“ „Hampton Roads“ nashriyoti tomonidan alohida kitob sifatida chop etilgan. U „Illusions“ asarida tasvirlangan qoʻllanmaga taqlid qilingan boʻlib, romandagi falsafiy gʻoyalarga asoslangan yangi iqtiboslarni oʻz ichiga oladi.
Adaptatsiyalar
„Illusions“ asari asosida ishlangan komiks 1978-yilning 19-iyunidan 30-iyuliga qadar „Best Sellers Showcase“ rukni ostida qismlarga boʻlib eʼlon qilingan.
Rejissyor Zack Snyder ushbu kitob asosida ssenariy yozgan hamda bu asar uning 2011-yilgi „Sucker Punch“ va 2021-yilgi „Army of the Dead“ filmlariga katta taʼsir koʻrsatganini taʼkidlagan.
2014-yilgi mantiqiy davomi
2014-yilda Bach ogʻir aviahalokatdan omon qolganidan soʻng, asarning davomi boʻlmish „Illusions II: The Adventures of a Reluctant Student“ kitobini nashr ettirdi.