King devid

Кинг девид — кузги олма нави. Ўзбекистонга АКШдан келтирилган (Жонатан ва Арканзас блок навларини чатиштириб чикарилгап). Р. Р. Шредер номидаги Боғдорчилик, узумчилик ва виночилик илмий тадқиқот институтида навга илмий тавсиф берилган. Америка ва Европа боғдорчилигида кузги, тез ҳосилга кирадиган ва серҳосил нав сифатида кенг тарқалган. Дарахти ўрта бўйли, шохшаббаси сийракроқ. Кўчати ўтқазилгач, кучсиз ўсадиган пайвандтагларда 3—4йили, кучли пайвандтагларда 6— 7-йили ҳосилга киради. Апрел ўрталарида гуллайди. Меваси ўртача (90— 100 г.), чиройли, тўқ малина-қизғиш рангда, билинар-билинмас оч сариқ нуқталари бор. Эти оч сариқ, қаттиқ, серсув, нордон-ширин, хушбўй. Меваси кам тўкилади. Меваси августнинг биринчи декадасида терилади, декабргача мазаси бузилмай яхши сақланади. Узоқ жойларга жўнатишга яроқли.