Muhammad Amin Andrabiy
Muhammad Amin Andrabiy (1940-yilda Kashmirning Srinagar shahrida tugʻilgan — 2001-yil 29-dekabrda vafot etgan)[1] nufuzli Andrabiy sayyidlar oilasining aʼzosi edi. U soʻfiy shayx va diniy olim Mir Ahmadning oʻgʻli boʻlgan. U Ibn Arabiy, Muhammad Iqbol, Frithjof Schuon, Sayyid Hussayn Nasr va Henry Corbin kabi mualliflar asarlaridan ilhomlangan metafizikaning anʼanaviylik maktabiga mansub edi[2].
Andrabiy Kashmirning ilk zamonaviy maktabi boʻlgan Islamiya oʻrta maktabida tahsil olgan. U yoshligidan tillarni oʻrganishga qiziqqan va maktabda ingliz, arab, fors hamda urdu tillarini oʻrgangan. U Kashmir universitetida urdu tili boʻyicha doktorlik darajasini olgan. Uning ilmiy rahbari Janubiy Osiyoning XX asrdagi eng nufuzli urdushunos olimlaridan biri Aal-e-Ahmad Surur boʻlgan[3]. Shuningdek, otasi unga Islom tarixi, huquqi va falsafasidan taʼlim bergan.
Andrabiy mehnat faoliyatini Srinagardagi Islamiya fan va savdo kollejida oʻqituvchilikdan boshlagan va u yerda urdu adabiyotidan dars bergan. 1980-yilda u Kashmir universitetiga professor lavozimiga ishga kirgan. 1980-yillarning oʻrtalaridan vafotigacha universitetning Iqbol institutiga rahbarlik qilgan. Ushbu tadqiqot markazida olimlar doktorlik tadqiqotlarini olib boradilar. Andrabiy bu yerda adabiyot, adabiy tanqid, falsafa, tilshunoslik, tarix va qiyosiy dinshunoslik yoʻnalishlaridagi doktorlik tadqiqotlariga rahbarlik qilgan va ilmiy maslahatlar bergan.
U urdu adabiyoti boʻyicha yirik mutaxassis hisoblangan. Adabiy tanqid, qiyosiy dinshunoslik va islom falsafasiga qoʻshgan hissasi bilan yodda qolgan. U ikkita kitob yozgan va uning asarlari dunyoning turli mamlakatlaridagi bir qancha adabiy jurnallarda chop etilgan.
Manbalar
- ↑ „Prof Andrabi passes away“ (en). DAWN.COM (2001-yil 31-dekabr). Qaraldi: 2020-yil 15-iyul.
- ↑ Muhammad Maroof Shah. „A Scholar-Intellectual“. Greater Kashmir (2015-yil 5-avgust). 2016-yil 16-fevralda asl nusxadan arxivlangan.
- ↑ Ahmad, Farooq (18 June 2015). "Prof Mohammad Amin Andrabi Hayat aur Karnamay" (Urdu). University. https://shodhganga.inflibnet.ac.in/handle/10603/43465.