Ziyosfera

Rock 'n' Roll Kids

„Rock 'nʼ Roll Kids“ — Paul Harrington va Charlie McGettigan tomonidan ijro etilgan, muallifi esa Brendan Graham boʻlgan qoʻshiq. U Irlandiya nomidan 1994-yilgi Eurovision qoʻshiq tanlovida, Dublinda boʻlib oʻtgan tanlovda ijro etilgan. Unda Irlandiya misli koʻrilmagan tarzda ketma-ket uchinchi marta gʻalaba qozondi va umuman olganda mamlakatning tanlovdagi oltinchi gʻalabasiga erishildi.

„Rock 'n' Roll Kids“
Paul Harrington va Charlie McGettigan qoʻshigʻi
B tomon „Rock 'N' Roll Kids (Akustik Mix)“
Chiqarilgan sanasi 1994
Qoʻshiq muallif(lar)i Brendan Graham
Official performance video
„Rock 'n' Roll Kids“ YouTubeda

Tarixi

Yaratilishi

„Rock 'n' Roll Kids“ qoʻshigʻini Brendan Graham yozgan. Matn jihatidan qoʻshiq dastlab yetti banddan iborat boʻlib, unda 60-, 70-, 80- va 90-yillar kabilar aks etgan, biroq bir DJning maslahati bilan Graham qoʻshiq juda uzun boʻlib qolgan deb hisoblab, oxirgi ikkita bandni olib tashlagan. Graham qoʻshiq nomi uchun ilhomni 1991-yilda Dublindagi Milliy stadionda boʻlib oʻtgan Fats Domino kontsertida olgan. U qoʻshiqni 1992 va 1993-yillarda tanlovga topshirgan, ammo ikkala safar ham oʻtolmagan, 1994-yilda esa qabul qilingan. Grahamning aytishicha, „Men bu qoʻshiqni kichkina qoʻshiq, oshxonadagi suhbat sifatida koʻrdim va tinglovchilarni oʻsha oshxonaga, oʻsha suhbatning ichiga tortishni xohladim“[1].

Eurovision

1994-yil 13-martda Paul Harrington va Charlie McGettigan ijro etgan „Rock 'n' Roll Kids“ qoʻshigʻi RTÉ (Raidió Teilifís Éireann) tomonidan tashkil etilgan, 1994-yilgi Eurovision qoʻshiq tanlovi uchun qoʻshiq va ijrochisini aniqlovchi Iralandiya milliy tanlovida qatnashdi. Qoʻshiq tanlovda gʻolib boʻldi va shu tariqa u Irlandiya nomidan qatnashuvchi ishtirokchiga aylandi[2].

Irlandiya ommaviy axborot vositalarida qoʻshiq ataylab gʻolib boʻlmasligi uchun tanlangani haqidagi afsona mavjud edi. Tanlov qoidalariga koʻra, avvalgi yil gʻolibi keyingi mavsumga mezbonlik qilishi kerak. Shunga koʻra, RTÉ uchinchi yil ketma-ket mezbonlik qilishga tayyor emas edi, degan fikr yuritilgan, ammo bu hech qachon isbotlanmagan. Hatto Irlandiya 1997-yilda ham tadbirga mezbonlik qilganida, irlandiyalik ishtirokchi Marc Roberts RTÉ undan yana gʻalaba qozonishni xohlaganini tasdiqlagan, chunki ular navbatdagi yildagi ehtimoliy yana bir Irlandiya gʻalabasi uchun mezbonlikni oʻz zimmasiga olish yuzasidan BBC bilan kelishuvga erishgan edi.

1994-yil 30-aprelda Eurovision qoʻshiq tanlovi RTÉ mezbonligida va butun qitʼa boʻylab jonli efirda namoyish etilgan holda Dublindagi Point teatrida boʻlib oʻtdi. McGettigan va Harrington „Rock 'n' Roll Kids“ qoʻshigʻini kechada uchinchi boʻlib ijro etishdi; ulardan oldin Finlandiya nomidan CatCat ijro etgan „Bye Bye Baby“, ulardan keyin esa Kipr nomidan Evridiki ijro etgan „Ime Anthropos Ki Ego“ yangradi[3].

Ovoz berish yakunida qoʻshiq 226 ball toʻpladi, yigirma besh ishtirokchi orasida birinchi oʻrinni egallab, tanlovda gʻolib bo'ldi[4]. Bu tanlov tarixida orkestr joʻrligida ijro etilmagan ilk gʻolib qoʻshiq boʻldi: McGettiganning gitara va Harringtonning pianinosi yagona cholgʻu asboblari edi. Shuningdek, bu tanlov tarixida birinchi marta 200 balldan koʻp ball toʻplagan qoʻshiq va birinchi marta bir mamlakat ketma-ket uch marta gʻolib chiqqan holat boʻldi. Qoʻshiq keyinchalik 1995-yilgi tanlovda gʻolib boʻlgan, Norvegiya nomidan ishtirok etgan Secret Garden guruhi ijro etgan „Nocturne“ ga oʻz oʻrnini boʻshatdi. Oʻsha yili Irlandiya nomidan esa „Dreamin'“ qoʻshigʻi bilan Eddi Friel qatnashdi.

Keyingi voqealar

2005-yil 22-oktabrda Kopengagenda boʻlib oʻtgan Eurovisionning ellik yillik yubiley tanlovi — Congratulations: 50 Years of the Eurovision Song Contest da McGettigan va Jakob Sveistrup tanaffus qismining bir qismi sifatida „Rock 'n' Roll Kids“ni ijro etishdi[5].

Ularning gʻalabasiga 20 yil toʻlishini nishonlash maqsadida, Harrington va McGettigan 2014-yilda Dublindagi Sugar Clubda kontsert berishdi. Graham Eurovison kubogini qabul qilarkan, qoʻshiq uchun ilhom kelgani haqida shunday eslagan: „Men Point Depot sahnasida turganimda, qarsaklar va olqishlar orasidan Liffi sohillari ustidan oʻrlab kelayotgan bir tovushni eshitdim — oʻsha gumburlagan, joʻshqin pianino tovushini… va bir lahzaga men bu yerda emasdim. 1991-yilning oʻsha dim Dublin kechasida, Bourbon koʻchasidagi Stadionga qaytgandek boʻldim. Rahmat senga, Fats!“

Jadvallar

Haftalik jadvallar

Jadval (1994) Eng yuqori
oʻrin
Belgiya bayrogʻi Belgiya (Ultratop 50 Flanders)[6] 42
Niderlandlar bayrogʻi Niderlandiya (Single Top 100)[7] 30
Irlandiya bayrogʻi Irlandiya (IRMA)[8] 2

Meros

Father Ted serialining „A Song For Europe“ epizodi RTE goʻyoki „Rock 'n' Roll Kids“ni ataylab yutqazish maqsadida tanlagani haqidagi afsonaviy voqeaga asoslangan.

Manbalar

  1. ↑ Lynch, Michael. What's Another Year, First, Dublin: Liberties Press, 2016 — 133-bet. ISBN 978-1-910742-43-3. 
  2. ↑ „Irish Selection 1994“. Eurovisionworld.
  3. ↑ „Eurovision Song Contest 1994“. Eurovision Song Contest. 30 April 1994. RTÉ / EBU.
  4. ↑ „Official Eurovision Song Contest 1994 scoreboard“. Eurovision Song Contest.
  5. ↑ „Congratulations: 50 Years of the Eurovision Song Contest“. Eurovision Song Contest. 22 October 2005. DR / EBU.
  6. ↑ "Paul Harrington & Charlie McGettigan – Rock 'n' Roll Kids" (niderlandcha). Ultratop 50. Qaraldi: 2022-yil 1-may.
  7. ↑ "Paul Harrington & Charlie McGettigan – Rock 'n' Roll Kids" (niderlandcha). Single Top 100. Qaraldi: 2022-yil 1-may.
  8. ↑ "The Irish Charts – Search Results – Paul Harrington". Irish Singles Chart. Qaraldi: 2022-yil 1-may. 


"https://new.ziyosfera.uz/ziyo/Rock_'n'_Roll_Kids" dan olindi