Zamanbank
Zaman-bank — Qozogʻistondagi mintaqaviy banklardan biri boʻlib, asosan Pavlodar viloyatidagi yuridik va jismoniy shaxslarga xizmat koʻrsatadi.
Tarixi
Zaman-Bank 1991-yil 6-iyunda Olmaota shahrida Qozogʻiston Sovet Sotsialistik Respublikasi milliy davlat banki tomonidan bank faoliyatini amalga oshirish uchun litsenziya (MP №11) berilishi bilan xususiy bank sifatida tashkil etilgan. Qozoqcha „Zaman“ soʻzi ingliz tilida „davr“ maʼnosini anglatadi[1].
1996-yil sentyabr oyida bank aksiyadorlik jamiyatiga aylantirildi. 1998-yilda bankning yangi aksiyadorlari uning bosh qarorgohini Olmaota shahridan Ekibastuz shahriga (Pavlodar viloyati) koʻchirishga qaror qildilar.
2003-yilda Zaman-Bank Olmaota shahrida oʻz filialini ochdi. 1-martdan boshlab bank Qozogʻiston Yuridik shaxslar uyushmasi hamda Qozogʻiston moliyachilari uyushmasining toʻlaqonli aʼzosiga aylandi. 2003-yilda bank Qozogʻiston Milliy bankining xalqaro buxgalteriya hisobi standartlariga oʻtish boʻyicha talablariga javob bergan Qozogʻistonning dastlabki ikkinchi darajali banklari qatoridan joy oldi. Shu yilning oʻzida bank moliyaviy hisobotlarni Xalqaro moliyaviy hisobot standartlariga muvofiq tayyorlash tizimiga oʻtdi. 2013-yil may oyida Zaman-Bank Islom Taraqqiyot Banki tarkibiga kiruvchi xususiy sektorni rivojlantirish boʻyicha Islom korporatsiyasi bilan hamkorlik toʻgʻrisidagi bitimni imzoladi[2][3]. Bundan avval Zaman-Bank egalari va ICD hamkorligida Qozogʻistondagi ilk islomiy lizing (ijara) kompaniyasi tashkil etilgan edi[4]. Shu yilning 13-oktyabrdan boshlab bank jismoniy shaxslarning omonatlarini majburiy jamoaviy kafolatlash tizimining aʼzosi hisoblanadi.
2014-yilda Zaman-Bank rasman islom bankiga aylanish niyatini eʼlon qildi[3]. 2017-yil 17-avgustda Zaman-Bank Qozogʻiston Milliy bankidan tegishli litsenziyani olgach, rasman islom banki maqomini qoʻlga kiritdi. Natijada bank mamlakatdagi ikkinchi islom bankiga aylandi[2][3].
Manbalar
- ↑ „ICD“ (en). icd-ps.org. Qaraldi: 2024-yil 15-aprel.
- ↑ 2,0 2,1 Satubaldina, Assel „Zaman-Bank becomes Kazakhstan's second Islamic Bank“ (en). The Astana Times (2017-yil 28-avgust). Qaraldi: 2019-yil 18-aprel.
- ↑ 3,0 3,1 3,2 „Zaman Bank pivots to become Kazakhstan's second-ever Islamic bank“ (en-US). IBS Intelligence (2017-yil 31-avgust). 2019-yil 18-aprelda asl nusxadan arxivlangan. Qaraldi: 2019-yil 18-aprel.
- ↑ „ICD and Zaman Bank in strategic alliance“ (en). Arab News (2013-yil 31-may). Qaraldi: 2019-yil 18-aprel.