Zilola To'laganova ishi

Zilola To'laganova ishi - O'zbekiston Respublikasida shu ismdagi ayolning farzandini (qiz bola) ikki marta o'ldirishga uringani bilan bog'liq ish.

1991-yilda tug'ilgan, Toshkentdagi oliy o'quv yurtlaridan birida (ochiqlanmagan) o'qituvchi vazifasida ishlovchi Z. To'laganova 2022-yil 28-yanvar kuni 2018-yilda tug'ilgan 3 yoshli qizi Zarina Axadovani Toshkent hayvonot bog'idagi Kavkaz qo'ng'ir ayig'i (laqabi Zuzu) saqlanuvchi qafasga tashlab yuborgan. Hodisa oqibatida yirtqich hayvon qizga tashlanmagan, uning oldiga borib hidlab, keyin oldidan - qafasning boshqa qismiga ketgan. Hayvonot bog'i xodimlari ayiqni qafasning qizga xavf tug'dirmaydigan qismiga olib o'tish choralarini ko'rganidan so'ng qiz qafasdan chiqarib olingan. Keyinchalik, shifoxonaga yetkazilgandan so'ng qizga ochiq bosh miya jarohati va bosh miya chayqalishi tashxisi qo'yilib bir qancha muddatdan so'ng uyiga javob berilgan. Natijada Sergeli tuman prokuraturasi tomonidan fuqaro Z. To'laganovaga nisbatan Jinoyat Kodeksining 25-moddasi (jinoyatga suiqasd) orqali 97-modda 2-qismi "v" bandi bilan jinoyat ishi ochilgan. Voqeani yozib olgan hayvonot bog'i kameralaridagi tasvir ijtimoiy tarmoqlarda tarqalgach jamoatchilik orasida keskin muhokamalarga sabab bo'lgan. Keyinchalik sudda Z. To'laganova ushbu harakatni aqliy norasolik va xatti-harakatlari oqibatini tushunmaydigan holatda amalga oshirgan deb topilib jinoiy javobgarlikka tortilmagan. U sud ajrimi bilan Respublika kuzatuvi kuchaytirilgan ruhiy kasalliklari shifoxonasida majburiy davolanishi belgilangan. Xodisadan 11 oy o'tib o'sha yilning 13-dekabr sanasida Z. To'laganova jamoatchilik vakillari va tashkilotlari ko'magida Toshkent shahrida "Meni eshiting" nomli san'at ko'rgazmasini o'tkazgan. Ko'rgazmada uning 30dan ziyod ijodiy ishlari, badiiy muharrirlik qilgan qilgan 100dan ortiq kitoblar va uning shaxsiy hayotiga bog'liq turli fotosuratlar namoyish qilingan. Shundan so'ng 2025-yilgacha bo'lgan oraliqda ayol va/yoki uning qiziga bog'liq hech qanday hodisa ijtimoiy tarmoqlarda tarqalmagan biroq 2025-yil 2-avgustda Z. To'laganovaga ruhiy kasalliklar shifoxonasidan ambulator davolanish sharti bilan javob berilgan. Ayol o'zi yashovchi mahalla vakillari bilan normal muloqot qilgan. Lekin, 8-sentyabr kunida o'zini noodatiy ravishda tutib qizi Z. Axadovaga oshxona pichog'i yordamida tan jarohati yetkazgan. Qiz olgan tan jarohatlari natijasida vafot etgan. Voqea oqibatida Sergeli tuman Prokuraturasi tomonidan ayolga nisbatan JK'ning 97-moddasi (qasddan odam o'ldirish) bilan jinoyat ishi ochilgan. Hozirda tergov harakatlari davom etmoqda.