Abdulloh ibn Hammod

Абу Абдурраҳмон Абдуллоҳ ибн Ҳаммод ибн Айюб ибн Мусо ибн Туфайл ал-Омулий
Шахсий маълумотлар
Вафоти	милодий 886-йил (ҳижрий 273-йил)
Дини	Ислом
Танилган соҳаси	ҳадис ҳофизи

Абдуллоҳ ибн Ҳаммод (арабча: عبد الله ابن حماد — Абу Абдурраҳмон Абдуллоҳ ибн Ҳаммод ибн Айюб ибн Мусо ибн Туфайл ал-Омулий,? — 273/886,?) — ҳадис ҳофизи.

Имом-пешво, сўз ва ривоятлари ишонч­ли ҳофизлардан саналган Абдуллоҳ ибн Ҳаммод Марвга қарашли Омул шаҳарчасидан. У ерни, шунингдек, Амав деб ҳам аташган. Шунинг учун олимга ал-Амавий деган нисбат ҳам берилади. Абдуллоҳ ибн Ҳаммоднинг таваллуд санаси номаълум, унинг вафот йили сифатида эса икки хил сана — 269/882 ҳамда 273/886-йиллар кўрсатилган.

Ҳадислари

Абдуллоҳ ибн Ҳаммод ҳадис илмида билимдонлардан бўлган. Абдуллоҳ ибн Маслама ал-Қа’набий, Абу-л-Ямон, Сулаймон ибн Ҳарб, Са’ид ибн Абу Марям, Яҳё ал-Вуҳозий, Яҳё ибн Ма’ийн, Са’ид ибн Мансур, Сулаймон ибн Абдурраҳмон, Абу Солиҳ Котиб ал-Лайсий, Муҳаммад ибн Имрон ибн Абу Лайло, На’им ибн Ҳаммод ал-Марвазий, Абу-л-Жумоҳир ал-Кафрасусийларнинг суҳбатидан баҳраманд бўлган, улардан ҳадис эшитган.

Бағдодга бориб, Абдулғаффор ибн Довуд ал-Ҳарроний ва Абу-л-Жамоҳир Муҳаммад ибн Усмон ад-Димашқийлардан ҳадис тинглаган.

Ўз навбатида, Абдуллоҳ ибн Ҳаммоддан Аҳмад ибн Наср ибн Мансур ал-Марвазий, Абу Наср Муҳаммад ибн Ҳамдавайҳ, Муҳаммад ибн ал-Мунзир Шаккар, Умар ибн Бужайр, Иброҳим ибн Ҳузайм аш-Шоший, Ҳайсам ибн Кулайб, Абдуллоҳ ибн Муҳаммад ибн Я’қуб ал-Ҳорисий ва қози Абу Абдуллоҳ ал-Маҳомилийлар ҳадис ривоят қилганлар.

Таърифлар

Ибн Ҳиббон Абдуллоҳ ибн Ҳаммод ҳақида ўзининг „Ас-Сиқāт“ асарида зикр қилган. Хатиб ал-Бағдодий „Тарӣх Бағдāд“ („Бағдод тарихи“) асарининг ровийлар занжирида Абдуллоҳ ибн Ҳаммод ҳам иштирок этган ҳадисни келтирган.

Имом ал-Бухорийнинг ривоятида „Бизга Абдуллоҳ, унга Яҳё ибн Маъийн… ҳадис айтди“, деб бошланган ҳамда „Бизга Абдуллоҳ, унга Сулаймон ибн Абдурраҳмон, унга Мусо ибн Ҳорун ал-Бардий… ҳадис айтди“, деб зикр қилинган ҳадислардаги Абдуллоҳдан мурод Абдуллоҳ ибн Убай ал-Хоразмий ёки мазкур Абдуллоҳ ибн Ҳаммод экани хусусида уламолар орасида ихтилоф мавжуд. Ал-Ҳоким, Абу Ишоқ ал-Ҳаббол ва Абу Наср ал-Калобозийлар бу ровий Абдуллоҳ ибн Ҳаммод эканига ишонч ҳосил қилганлар.

Адабиётлар

1. Аз-Заҳабий. Сияр. „Муассаса ар-рисола“, 1985. ХИИ, 611;
2. Ибн Ҳажар. Таҳзӣб ат-таҳзӣб. „Доира ал-маъориф ан-низомийя“, 1910. В, 191. Ал-Хатиб. Тарӣх Бағдāд. — Байрут: „Дор ал-ғарб ал-исломий“, 2002. И, 108;
3. Имом Шамсиддин Заҳабий. Машҳур даҳолар сийрати.- Т.: „Ҳилол-нашр“, 2017. 47.