Abdurrahmon Toj

Абдурраҳмон Тож (арабча: عبد الرحمن تاج‎‎, 1896 — Миср — 1975) — Ал-Азҳар шайхи, ҳуқуқшунос ва давлат арбоби.

Абдурраҳмон Тож
Шахсий маълумотлар
Таваллуди	1896-йил
Вафоти	1975-йил Миср
Дини	Ислом
Танилган соҳаси	шайх, ҳуқушунос, давлат арбоби

Миср Араб Республикасининг Асют вилоятида туғилган.

Таълими

Ҳофизлик ҳамда бош­ланғич таълимни ватани Асютда олган. Оиласининг Искандарияга кўчиб келиши сабабли Искандария дин институтига (Маъ­ҳад ал-Искандарийя ад-диний) ўқишга киради (1910-йил). 1926-йилда ал-Азҳар университети шариат факултетини тугатган.

Фаолияти

Бир муддат Асют ва Қоҳира дин университетларида талабаларга дарс беради. 1933-йилда шариат факултети ўқитувчиси, икки йилдан сўнг ушбу фаолияти билан бирга фатво қўмитасининг ҳанафий мазҳаби ҳай’ати аъзолигига тайинланади. 1936-йилда ал-Азҳар университети томонидан Париждаги Сорбон университетига юборилади. У ерда „Бобийлик ва Ислом“ мавзусида номзодлик диссертация­сини ёқлаб, фалсафа ва динлар тарихи фанлари доктори илмий даражасини олади. У ердан қайтиб яна ал-Азҳар университети профессори ва фатво қўмитаси аъзоси сифатида вазифаларини давом эттиради. Шу билан бирга Абдурраҳмон Тож илмий тадқиқотлардан четланмаган ҳолда, „Ас-Сийāса аш-шар’ийя“ мавзуи­даги илмий иши юзасидан „Жамоат кибор ал-уламо“ жамияти аъзолигига сайланади (1951-йил). Бир муддат Айн аш-Шамс университетининг ҳуқуқ факултети ва асосий қонун (Конститусия) комиссияси аъзоси сифатида фао­лият олиб боради. 1954-йилда ал-Азҳар университети шайхи этиб тайинланади. Университетга таълим ва бош­қарув бў­йича янги қоидалар олиб киради. Хориждан келган талабалар учун ётоқхоналар қурдиради. 1958-йилда Миср ва Сурия мамлакатларининг ҳамкорлигида Бирлашган Араб жумҳурияти ташкил этилганидан сўнг, вазир этиб тайинланади. 1963-йилда Араб тили академияси (Мажмаъ ал-луға ал-’арабийя), кейинчалик эса, ал-Азҳар исломий тадқиқотлар академияси (Маж­маъ ал-буҳус ал-исламийя)га аъзо бўлади.

Асарлари

• „Ал-Аҳвāл аш-шахсийя фи-л-фиқҳ ал-ислāмӣ“ (Қохира 1955-йил);
• „Ас-Сийā­са аш-шар’ийя“;
• „Ҳукм ар-рибā фи-ш-шарӣ’а ал-ислāмийя“;
• „Шарикāт ат-­таъмӣн мин вижҳа назар аш-шарӣ’а ал-ислāмийя“.

Адабиётлар

• Али Абдулазим. Машӣха ал-Азҳар. — Қоҳира: 1399/1979. ИИ, 165, 177;
• Муҳаммад Абдулалим Ҳусайн. Ал-Азҳар аш-шарӣф фӣ ’ӣдиҳ ал-алфӣ — Қоҳира: 1403/1983. 259-260;
• Шуйӯх ал-Азҳар. — Қоҳира: 43-44;
• Муҳаммад Маҳдий Аллом. Ал-Маж­маъиййӯн фӣ хамсӣна ’āман. — Қоҳира: 1406/1986. 155-157;
• Раҳми Яран. „Абдурраҳман Тâc“. ТДВ İА. — İстанбул: 1988. И, 175.