Abr (obraz)

Абр (форсча) — булут. Алишер Навоий ижодида абр билан боғлиқ жуда кўп иборалар учрайди:

• Абри бало — бало булути, офатли булут;
• Абри баҳор — баҳор булути, кўклам булути;
• Абри баҳорий — баҳорги булут, сер­ёғин булут;
• Абри гуҳарбор — гавҳар ёғдирувчи булут; (мажозий) саховатли, қўли очиқ киши;
• Абри гуҳарсанж - гавҳар ёғдирувчи булут;
• Абри эҳсон — (мажозий) карам ва саховатда мардоналик, лутфу карам билан тўкин-сочин қилувчи;
• Абри кофурбез — қор ёғдирувчи булут;
• Абри карам — саховат, икром булути;
• Абри мутир — серёғин булут;
• Абри навбаҳор — эрта баҳордаги серёғин булут;
• Абри найсон — апрел ойидаги серёғин булут;
• Абри пурбор — қалин, серёғин булут;
• Абри ҳасрат — (мажозий) армон, қайғу ва ҳасратни кўпайтирувчи ҳодиса.
• Абри раҳмат — раҳмат ва барака ёмғирини келтирадиган булут;
• Абри қийрмонанд — қора булут

Абр ирфоний рамз шаклида банда ва Илоҳ ўртасидаги ҳижоб — парда. Бу шундай пардаки, истидлол ва ижтиҳод орқали Мутлақ Ҳақиқатга етишиш имконини беради. Шунингдек, абр илоҳий файз тимсоли сифатида ҳам қўлланилган.

Юзунг ғамида эрур абри навбаҳор кўз­ум,

Не айб, ер юзини қилса лолазор кўзум.

(„Ғаройиб ус-сиғар“, 434-ғазал)