Akrom Boboxonov

Akrom Boboxonov (1936-yil, Denov, Surxondaryo viloyati, Oʻzbekiston SSR) – oʻzbek va sovet agronomi, bir qancha ilmiy ishlar muallifi. 1974-yil SSSR Oliy Soveti Prezidiumining qarori bilan „Hurmat Belgisi“ ordeni bilan mukofotlangan. „Termiz-7“ gʻoʻza navi muallifi. SSSRda xizmat koʻrsatgan kashfiyotchi (1985).

Akrom Boboxonov
Tavalludi	1936-yil Denov, Surxondaryo viloyati, OʻzSSR, SSSR
Fuqaroligi	Oʻzbekiston
Kasbi	agronom
Unvoni	SSSRda xizmat koʻrsatgan kashfiyotchi
Mukofotlari	„Hurmat Belgisi“ ordeni

Hayoti

Akrom Boboxonov 1936-yil Oʻzbekiston SSR tarkibidagi Surxondaryo viloyatining Denov rayonida tugʻilgan. Oʻrta maktabni oʻzi yashagan qishloqdagi maktabni tamomlagach, Shahrisabz shahridagi qishloq xoʻjaligi texnikumining agronomlik fakultetiga oʻqishga qabul qilinadi. 1956-yili texnikumni qizil diplom bilan tamomlaydi.Shu yili, oliy taʼlimni olish uchun Samarqandga yoʻl oladi va Samarqand qishloq xoʻjaligi institutining agronomlik fakultetiga qabul qilingan. 1961-yili oliygohni aʼlo baholar bilan tamomlab, Surxondaryo oblasti qishloq xoʻjaligi boshqarmasiga ishga kiradi. Boshqarmada ishlagan paytlari Angor rayoniga Karl Marks tajribasini ommalashtirish boʻyicha ishga yuboriladi.

Faoliyati

1962-yilda Angor rayoni partiya komitetida „Kommunizm“ fermer xoʻjaligiga bosh agronom vazifasida ish boshladi. Bosh agronom sifatida ishlagan yillari fermer xoʻjaligi Surxondaryo oblasti boʻyicha yetakchi oʻrinni qayd etgan. 1963-yildan 1964-yilgacha Shoʻrchi rayoni qishloq xoʻjalik ishlab chiqarish boshqarmasida kichik agronom sifatida faoliyat olib bordi. 1964-yili Toshkent shahridagi SSSR paxtachilik ilmiy-tekshirish institutiga aspirantura taʼlim bosqichiga muvaffaqiyatli qabul qilingan va ushbu oliygohni 1967-yil tamomlagan. Aspiranturani tamomlash payti, „Oʻzbekistonning janubiy sharoitida ingichka tolali gʻoʻzani defoliatsiya qilish va mashinada terish“ mavzusida ilmiy ish qilgan. Ushbu ilmiy ishi muvaffaqiyatli deb topilib, Termiz shahridagi oblast paxtachilik stansiyasida amaliyotga tatbiq etilgan. 1969-yil 3-martda Samarqand qishloq xoʻjaligi institutida ham xuddi shu mavzuda ilmiy dissertatsiyasini himoya qildi. 1967-yildan 1970-yilgacha Surxondaryo oblasti paxtachilik ilmiy stansiyasida katta ilmiy xodim lavozimida ishladi. 1968-yili Sovet Ittifoqi Kommunistik partiyasi (KPSS)ga aʼzo boʻladi. 1970-yili „Xazorbogʻ“ fermer xoʻjaligiga bosh agronom etib tayinlangan. 1975-yilda Surxondaryo oblasti partiya komitetiga qarashli „V.Qodirov“ nomli fermer xoʻjaligi rahbari etib tayinlangan. 1981-yildan 1985-yilgacha Termiz shahridagi oblast tajriba stansiyasida rahbar etib tayinlanib, ipak paxta yetishtirish boʻyicha ilmiy izlanishlar olib bordi. 1985-yilda katta ilmiy xodim darajasiga erishdi.

Ilmiy ishlari

Akrom Boboxonovning ilmiy ishlari „Oʻzbekiston qishloq xoʻjaligi“, „Zemlyedeliye“, „Mexanizatsiya xlopkovodstvo“ kabi nufuzli jurnallarda eʼlon qilingan. Gʻoʻzaning „Termiz – 7“ nomli navini kashf etgan.

Mukofotlari

Ilmiy ishlari va faoliyati uchun Vladimir Lenin tavalludining 100 yilliga bagʻishlab ishlab chiqilgan medal bilan taqdirlangan. Oʻzbekiston SSR Oliy Soveti Prezidiumining qaroriga muvofiq, „Oʻzbekiston qishloq xoʻjaligi“ jurnalining 50 yilligiga atab joriy etilgan faxriy yorliq bilan taqdirlangan. 1974-yil SSSR Oliy Soveti Prezidiumining qarori bilan „Hurmat Belgisi“ ordeni bilan mukofotlangan. 2 marotaba SSSR xalq xoʻjaligining bronza medali bilan mukofotlangan. 1985-yilda „SSSRda xizmat koʻrsatgan kashfiyotchi“ unvoniga ega boʻldi.