Anita Traversi

Anita Traversi (25-iyul 1937-yil — 25-sentyabr 1991-yil) — shveysariyalik xonanda. 1960-1964-yillardagi „Eurovision qoʻshiq tanlovi“ ishtirok etgani bilan keng tanilgan.

Anita Traversi
Tavalludi	25-iyul 1937-yil Giubiasco, Shveysariya
Vafoti	25-sentyabr 1991-yil(1991-09-25) (54 yoshda)
Janrlar	pop
Kasbi	Xonanda

Faoliyati

Giubiasco shahrida tugʻilgan. Traversini musiqachi boʻlgan otasi qoʻllab-quvvatlagan va u 1950-yillarning oʻrtalaridan boshlab orkestr, jumladan, Shveysariyaning italyan tilidagi radiokanali orkestri bilan birga qoʻshiq kuylashni boshlagan. 1956-yilda u ilk bor tashkil etilgan „Eurovision qoʻshiq tanlovi 1956“ tanlovi uchun Shveysariya milliy saralash bosqichida qatnashgan, biroq uning „Bandanelle Ticinese“ qoʻshigʻi tanlab olinmagan. Oʻsha yili Traversi Quintetta Radiosa guruhining aʼzosi sifatida tanlov gʻolibi Lys Assianing har ikkala qoʻshigʻida, jumladan, gʻolib boʻlgan „Refrain“ taronasida bek-vokalchi sifatida qatnashgan. 1959-yilda Traversi Italiyada ovoz yozish studiyasi bilan shartnoma imzolagan hamda Adriano Celentano bilan birgalikda bir nechta qoʻshiqlarni, jumladan, eng sara oʻntalikka kirgan „Piccola“ xit taronasini yozgan. Anita Traversi Shveytsariya sharafini himoya qilib, Polshadagi „Sopot International Song Festival“, Braziliyadagi Rio-de-Janeyro festivali va Bolgariyadagi „Golden Orpheus“ kabi dunyoning bir qator nufuzli musiqa festivallarida katta muvaffaqiyatlarga erishgan. Sopotdagi qoʻshiq festivalida ikki marta qatnashgan. Birinchi marta 1962-yilda „Una certa sera“ (A. Scotti) va polshacha „Jesienna rozłąka“ („Dis-moi, dis-moi“) (Gert-Brok) qoʻshiqlari bilan ishtirok etgan. Ushbu chiqishi uchun u eng yaxshi ijro yoʻnalishida birinchi oʻrin bilan taqdirlangan. 1968-yilda xonanda Sopot festivalida ikkinchi marta Shveysariya nomidan qatnashgan. „Polsha kuni“ doirasida u polshacha „Odra rzeka“ („Odra“) (Pałasz-Fiszer) qoʻshigʻini ijro etgan va bu safar italiyalik Annarita Spinacidan keyin ikkinchi oʻrinni egallagan. Festival davomida Travers oʻsha tanlovning eng sevimli taronalaridan biriga aylangan „Balalaika“ qoʻshigʻini mahorat bilan ijro etgan. 1970-yilda u Bolgariyadagi „Golden Orpheus“ festivalining eng yirik yulduzlaridan biri sifatida bolgarcha „Edna bylgarska roza“ qoʻshigʻini yuqori mahorat bilan kuylagan. Rio-de-Janeyrodagi festivalda ham u taqdirlangan xonandalar qatoridan joy olgan.

Eurovision qoʻshiq tanlovi

1960-yilda Traversining Euvrovisiondagi ikkinchi urinishi muvaffaqiyatli yakunlangan. Uning „Cielo e terra“ („Osmon va yer“) qoʻshigʻi 29-mart kuni Londonda boʻlib oʻtgan beshinchi „Eurovision qoʻshiq tanlovi 1960“ tanlovida Shveysariya nomidan ishtirok etish uchun tanlab olingan. Euvrovisionning ilk davrlari uchun juda xos boʻlgan orkestr balladasi yoʻnalishidagi „Cielo e terra“ taronasi 13 ta ishtirokchi orasida sakkizinchi oʻrinni egallagan.

Traversi 1961-yilda („Finalmente“) va 1963-yillarda (uchta qoʻshiq, jumladan, nemis tilidagi ilk urinishi bilan) yana Shveysariya nomidan Euvrovision tanlovida qatnashishga harakat qilgan. Biroq har ikki yilda ham saralashdan oʻtolmagan. Nihoyat, xonanda 1964-yilda ikkinchi bor imkoniyatga ega boʻlgan va uning „I miei pensieri“ qoʻshigʻi 21-mart kuni Kopengagen shahrida oʻtkazilgan toʻqqizinchi „Eurovision qoʻshiq tanlovi 1964“ tanlovida qatnashish uchun tanlab olingan. Biroq, ushbu ballada hakamlarga manzur kelmagan va birorta ham ochko toʻplay olmay, oxirgi oʻrinni oʻzaro boʻlishib olgan toʻrtta qoʻshiqdan biriga aylangan.